ގުރައިދޫ ދާއިރާގެ ރައްޔިތުންނަށް ސަރުކާރުން ކޮށްދޭކަންކަން ރައްޔިތުން ބަލައިގަންނަ ކަމުގެ އުފާ އިޙްސާސްކުރެވޭކަމުގައި، އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ގުރައިދޫ ދާއިރާގެ ތިން ރަށަކަށް ފެއްޓެވި ކެމްޕޭން ދަތުރުފުޅުގައި މިއަދު މެންދުރު، ކ ގުރައިދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. ރައީސުލްޖުމްހޫރިއްޔާ ގުރައިދޫއަށް ވަޑައިގެންނެވުމުން އެރަށުގެ ރައްޔިތުންގެ ފަރާތުން ވަނީ އެމަނިކުފާނަށް ހޫނު މަރުޙަބާއެއް ދަންނަވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، މިސަރުކާރު އައި އިރު ގުޅިއަކީ، އޭގެ ކުރީގެ ސަރުކާރު ތަކުން އެކަހެރިކޮށް ބާކީކޮށްލާފައި އޮތް ރަށެއް ކަމަށެވެ. އެހެން ނަމަވެސް މިސަރުކާރުން ގުޅީގެ ރައްޔިތުންނަށް ބޭނުންވެފައިވާ އަސާސީ ޚިދުމަތްތައް ޤާއިމްކޮށްދިނުމުގެ ގޮތުން މަޝްރޫޢުތައް ހިންގިފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ.

މީގެ ކުރިން ގުޅިން އެމްޑީޕީއަށް މެޖޯރިޓީ ލިބުނަސް. ގުރައިދޫ ދާއިރާގައި އެމްޑީޕީއަށް މެޖޯރިޓީ ނުލިބޭކަން ފާހަގަކުރައްވައި، ގުރައިދޫ ދާއިރާގެ ބައި އިލެކްޝަންގައި، އެމްޑީޕީއަށް އެގޮނޑި ލިބުމަކީ ބޮޑު ކާމިޔާބީއެއްކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ވަނީ، ކުރިޔަށް އޮތް ދައުރުގައި މިސަރުކާރުން ގުޅީގެ ތަރައްޤީއަށް ކޮށްދޭނޭ ބައެއްކަންކަން ވެސް ހާމަކުރައްވާފައެވެ. 

އެމްޑީޕީގެ ރިޔާސީ ކެންޑީޑޭޓްގެ ހައިސިއްޔަތުން ރައީސުލްޖުމްހޫރިއްޔާ ކުރައްވަމުން ގެންދަވާ ކެމްޕޭން ދަތުރުފުޅުގައި، މިއަދު ހަވީރު ވަނީ މާލެ އަތޮޅު ގުރައިދޫއަށް ވަޑައިގެންފައެވެ.