ބޮރޫޝިއާ ޑޯޓުމަންޑުގެ އެކަޑަމީއިން ޕްރޮފެޝަނަލް ފުޓުބޯޅައަށް ނިކުމެ، އެ ކުލަބުގެ ސީނިއާ ޓީމާއެކު 12 ސީޒަން ހޭދަކުރުމަށްފަހު، އިތުރަށް އެގްރިމެންޓު އައު ނުކުރަން ނިންމާފައިވާކަމަށް އެ ކުލަބުގެ މިޑްފީލްޑަރ، މާކޯ ރެއުޒް އިއުލާންކޮށްފިއެވެ.

ޑޯޓުމަންޑުގެ ސަޕޯޓަރުންނަށް ފޮނުވި މެސެޖެއްގައި ރެއުޒް ބުނީ، އޭނާގެ މި ނިންމުމަކީ ކްލަބާއެކު މަޝްވަރާކުރުމަށްފަހު ނިންމި ނިންމުމެއް ކަމަށެވެ.

އެކަޑަމީގައި ހޭދަކުރި 10 އަހަރާއި އެކު، ރިއުޒްގެ ކޮންޓްރެކްޓު ހަމަވުމާ ހިސާބަށް ޖުމްލަ 22 އަހަރު އޭނާ މިވަނީ އެ ކްލަބާއިއެކު ހޭދަކޮށްފައެވެ.

Advertisement

މި ނިންމުމާ ގުޅިގެން ޑޯޓުމަންޑުގެ ސީއީއޯ ހޭންސް-ޖޯކިމް ވަޓްޒްކޭ ބުނީ، ޑޯޓުމަންޑަށް އުފަން ރެއުޒް، އެ ކުލަބުގެ އެކަޑަމީއާއި ސީނިއާ ޓީމުގައި ހޭދަކުރި ދުވަސްތަކުގައި ކްލަބާއެކު ތަފާތު ގުޅުމެއް އުފެދިފައިވާކަމަށެވެ. އަދި ފުޓުބޯޅައިން ރިޓަޔާ ކުރުމަށްފަހު، ކްލަބަށް އެނބުރި އަންނާނެކަމަށް އުންމީދުކުރާކަމަށް ވެސް އޭނާ ބުންޏެވެ.

އުމުރުން މިހާރު 34 އަހަރުގެ ރެއުޒް ވަނީ ޑޯޓުމަންޑާއިއެކު ޑީއެފްބީ ކަޕް ދެ ފަހަރަށް ކާމިޔާބު ކޮށްފައެވެ. އަދި 2018 ވަނަ އަހަރުން ފެށިގެން 2023/24 ސީޒަން ފެށުމާ ހަމައަށް އޭނާއަކީ ކްލަބުގެ ކެޕްޓަން ވެސް މެއެވެ. މީގެ އިތުރުން 2019 ވަނަ އަހަރުގެ ޖަރުމަނުގެ އެންމެ މޮޅު ކުޅުންތެރިޔާގެ މަގާމު ވެސް އޭނާ ވަނީ ހޯދާފައެވެ.

ސަޕޯޓަރުންނަށް ރެއުޒް ފޮނުވި މެސެޖުގައި އޭނާ އިތުރަށް ފާހަގަކޮށްފައިވާ ގޮތުގައި، އޭނާގެ ފެއާވެލް ވެގެންދާނީ ވަރަށް އުނދަގޫ ވަގުތުކޮޅަކަށެވެ. ނަމަވެސް މި ސީޒަނުގައި ކުރިޔަށް މުހިންމު މެސެޖުތަކެއް ހުރުމުން، މިކަން ސަޕޯޓަރުންނަށް ކުރިން ހިއްސާކުރުމަށްފަހު މެޗުތަކަށް އަވަހަށް ފޯކަސް ކުރަން ބޭނުންވީކަމަށް އޭނާ ބުންޏެވެ. އެގޮތުން ވެމްބްލީގައި ކުޅޭ ޗެމްޕިއަންސް ލީގުގެ ފައިނަލަށް ދަތުރުކޮށް، އެ ތަށި އަނބުރާ ޑޯޓުމަންޑަށް ގެންނަށް ބޭނުންވާކަމަށް އޭނާ ފާހަގަކޮށްފައިވެއެވެ.