ކުރިޔަށް އޮތް ރިޔާސީ އިންތިޚާބުގެ ކެމްޕޭން ދަތުރުފުޅެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް މިއަދު މާލެ އަތޮޅު ގުރައިދޫއަށް ވަޑައިގެންފިއެވެ.

އެމްޑީޕީން ހާމަކޮށްފައިވާ ގޮތުގައި މިއަދު އެޕާޓީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު މާލެ އަތޮޅުގެ ތިންރަށަކަށް ފެއްޓެވި ދަތުރުފުޅުުގައި ވަޑައިގަންނަވާނީ، ގުޅި، ގުރައިދޫ، އަދި މާފުއްޓަށެވެ. މިގޮތުން ރައީސުލްޖުމްހޫރިއްޔާ މިއަދު މެންދުރު އެންމެ ފުރަތަމަ ވަޑައިގެންނެވީ، ގުޅިއަށެވެ. އެރަށުގެ ރައްޔިތުންގެ ފަރާތުން ރައީސުލްޖުމްހޫރިއްޔާއަށް ވަނީ ހޫނު މަރުޙަބާއެއް ދަންނަވާފައެވެ.

ގުޅީގެ ރައްޔިތުންނާއި ބައްދަލު ކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވަނީ، މިސަރުކާރުން ރައްޔިތުންނަށް ވީ ވަޢުދުތަކުގެ 90 އިންސައްތަ ފުއްދިފައިވާކަމުގައި ވިދާޅުވެފައެވެ. އަދި ގުޅިއަށް ސަރުކާރުންވީ ވަޢުދުތަކުގެ ތެރެއިން ގިނަ ކަންތައްތައް ފުއްދައި ދެވި، އަދި މިހާރުވެސް މަޝްރޫޢުތައް ހިނގަމުންދާކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މާލެ އަތޮޅުގެ ބައެއް ރަށްރަށަށް ފެއްޓެވި ކެމްޕޭން ދަތުރުފުޅުގައި މިއަދު ހަވީރު ވަޑައިގެންނެވީ، މާލެ އަތޮޅު ގުރައިދޫއަށެވެ. އެރަށުންވެސް އެމަނިކުފާނަށް ހޫނު މަރުހަބާއެއް ދަންނަވާފައި ވާއިރު، މިރޭ ކެމްޕޭން ޖަލްސާ ބޭއްވުމަށް ހަމަޖެހިފައި ވަނީ މާފުށީގައެވެ.