ކުނިއެޅުމަށް ބޭނުން ކުރުމަށް ވެމްކޯއިން ތަޢާރަފްކުރަ ކޮތަޅު ބުރާސްފަތި ދުވަހުން ފެށިގެން ވިއްކަން ފަށާނެ ކަމުގައި، ވެމްކޯއިން ހާމަކޮށްފިއެވެ.

އެކުންފުނިން ބުނީ،  ކުނި މެނޭޖްކުރުމުގެ ގާނޫނުގައިވާ ވާ ގޮތަށް، ކުނި އެޅުމަށް ހާއްސަ "ބިންލައިނާ" ވިއްކުމަށް މިހާރު އެކުންފުނިން ތައްޔާރުވަމުންދާ ކަމަށެވެ. މިގޮތުން، އެކުންފުނިން ވިއްކާނީ ކަޅު އަދި ފެހި ކުލައިގެ ތިން ސައިޒެއްގެ ކޮތަޅު ކަމަށް ވެމްކޯއިން ހާމަކޮށްފައިވެއެވެ.

ވެމްކޯއިން ހާމަކޮށްފައިވާ ގޮތުގައި އެކުންފުނިން ވިއްކާނީ، 17*11, 27*18, 48*36 އިންޗީގެ ކޮތަޅެވެ. ކުނިވާ ޒާތުގެ ކުނި ނުވަތަ އަމިއްލައަށް ފަނާވެދާ ޒާތުގެ ކުނި ފެހި ކޮތަޅުގައި ބަންދުކޮށް، އެހެނިހެން ބާވަތްތަކުގެ ކުނި ކަޅު ކޮތަޅުގައި ބަންދުކުރުމަށް އެ ކުންފުނިން ވަނީ އެދިފައެވެ.

ޑަސްބިންތަކުގައި ބޭނުން ކުރާނެ ކޮތަޅު ވިއްކުމުގެ މަސައްކަތް ވެމްކޯއިން ފަށާފައި މިވަނީ، ތިމާވެށި ރައްކާތެރި ކުރުމާއި ބެހޭ ޤާނޫނަށް އިސްލާހް ގެނެސް އާއްމު ވިޔަފާރީގައި ބޭނުންކުރާ ޕްލާސްޓިކް ކޮތަޅުން 2 ރުފިޔާގެ ފީއެއް ނަގަން ފެށުމުންނެވެ. އަދި އެކަމާއި ގުޅިގެން އާއްމު ބައެއް ފަރާތްތަކުން ވަނީ ކަންބޮޑުވުން ފާޅުކޮށް ސަރުކާރަށް ފާޑުވެސް ކިޔާފައެވެ.