ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް ހައްލު ހޯދުުގެ ގޮތުން މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން، "އޮޕަރޭޝަން ކުރަނގި"ގެނަމުގައި ޚާއްޞަ އޮޕަރޭޝަނެއް ފަށައިފިއެވެ.

ރާއްޖޭގައި ތިބި ބިދޭސީންގެ އިނގިލީގެ ނިޝާން ނަގައި ކާކުކަން ދެނެގަތުމުގެ މަސައްކަތް ކުރުމަށް ހިންގާ މި އޮޕަރޭޝަން ފެށުމުގެ ރަސްމިއްޔާތު ބާއްވާފައި ވަނީ މިއަދު ހެނދުނު، ކ. ހިންމަފުށީގައެވެ.

މިރަސްމިއްޔާތުގައި، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙްސާން ވިދާޅުވީ، މި އޮޕަރޭޝަނުގެ ބޭނުމަކީ ޤަވާއިދާއި ޚިލާފަށް އުޅޭ ބިދޭސީން ހައްޔަރުކޮށް ޑީޕޯޓް ކުރުން ނޫންކަމަށާއި، މިވަގުތު އޮޕަރޭޝަން އަމާޒުކޮށްފައި ވަނީ، މީހުން ދެނެގަތުމާއި އެމީހުންގެ އައިޑެންޓިޓީ ކަށަވަރު ކުރުން ކަމަށެވެ.

މީގެ އިތުރުން މިނިސްޓަރ އިޙްސާން ވިދާޅުވީ، މިއޮޕަރޭޝަންގެ ފުރަތަމަ މަރުޙަލާގެ ބޭނުމަކީ، ރާއްޖޭގައި ތިބި ޤަވާއިދާއި ޚިލާފަށް އުޅޭ ބިދޭސީން ޤަވާއިދުގެ ތެރެއަށްފެއްތުން ކަމަށެވެ. 

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީން، ރެގިއުލަރައިޒް ކުރުމުގެ ޕްރޮގްރާމެއް ކުރީ ސަރުކާރުންވެސް ފެށިއެވެ. އެހެން ނަމަވެސް ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް މިހާތަނަށް އެކަށިގެންވާ ޙައްލެއް ލިބިފައެއް ނުވެއެވެ.