ޔޫއެފާ ޗެމްޕިއަންސް ލީގުގައި ބުދަ ދުވަހުގެރޭ ޖަރުމަނުގެ ބޮރޫޝިއާ ޑޯޓްމަންޑުން ފްރާންސްގެ ޗެމްޕިއަން، ޕެރިސް ސެއިންޓް-ޖާމެއިން (ޕީއެސްޖީ) 1-0 އިން ބަލިކޮށް، ސެމީ ފައިނަލުގެ ފުރަތަމަ ލެގު ކާމިޔާބުކޮށްފިއެވެ.

ރީނދޫ ކުލައިން ޖަރީވެފައި އޮތް ޑޯޓުމަންޑުގެ ސިގްނަލް އިޑޫނާ ޕާކުގައި ކުޅުނު މި މެޗުގެ ހަމައެކަނި ގޯލު ކާމިޔާބުކޮށްދީފައިވަނީ އެ ޓީމުގެ ފޯވާޑް، ނިކްލަސް ފުލްކުރޫގްއެވެ.

މެޗުގެ ނަތީޖާ ހަމަހަމަ ކުރުމަށް ޕީއެސްޖީއިން ކުރަމުން ދިޔަ މަސައްކަތުގައި، މަދު ސިކުންތު ކޮޅެއްގެ ތެރޭގައި އެމްބައްޕޭ އަދި އަޝްރަފް ހަކީމީ ގޯލަށް ފޮނުވާލި ހަމަލާތައް ފާހަގަ ކުރެވެއެވެ. ފުރަތަމަ އެމްބައްޕޭ ގޯލުގެ ކަނާތް ފަޅިން ދުރުކަނަށް ފޮނުވާލި ބޯޅަ ދަނޑީގައި ޖެހިފައި ނިކުމެފައި ވަނިކޮށް ޑޯޓުމަންޑަށް އެ ހަމަލާ ސާފުކޮށް ނުލެވެނީސް ހަކީމީ އަނެއްކާވެސް އެ ބޯޅަ ގޯލަށް ފޮނުވާލަން މަސައްކަތް ކުރިއެވެ. ނަމަވެސް މިފަހަރު ވެސް ހުރަހަކަށްވީ ގޯލުގެ ދަނޑިއެވެ.

މީގެ އިތުރުން ޕީއެސްޖީގެ ހަމަލާތައް ދިފާއު ކުރުމުގައި ޑޯޓުމަންޑުގެ ކީޕަރު ގްރެގޯ ކޮބެލް ކުރި މަސައްކަތް ފާހަގަކޮށްލެވެއެވެ. އެގޮތުން އެމްބައްޕޭގެ ބޯޅައަކުން އުސްމާން ޑެމްބެލޭ ގޯލުގެ ވަރަށް ކައިރީގައި ހުރެފައި ފޮނުވާލި ބޯޅަ ސަލާމަތްކުރުވުނީ ކޮބެލްގެ ހުޝިޔާރު ކަމުންނެވެ.

ގްރޫޕް ސްޓޭޖުގައި މި ދެ ޓީމު ވެސް ހިމެނިފައިވަނީ އެއް ގްރޫޕެއްގައެވެ. ގްރޫޕް  އެއްވަނަ ޑޯޓްމަންޑުން ހޯދާފައިވާއިރު ޕީއެސްޖީއަށް ލިބުނީ ދެވަނައެވެ. އަދި މި ދެ ޓީމުގެ ކުރިމަތިލުންތަކުގައި، ފްރާންސްގައި ކުޅުނު މެޗު ޕީއެސްޖީ 2-0 އިން ކާމިޔާބުކޮށްފައިވާއިރު، ޑޯޓްމަންޑުގައި ކުޅުނު މެޗު ވަނީ 1-1 އިން އެއްވަރުވެފައެވެ.