މެދު އިރުމައްޗަށް މިހާރު ކުރަމުންދާ ވިއްސާރައިގައި މަދީނާގެ ރަށްބޭރުގައިވާ އުހުދު ފަރުބަދަ މަތިން ފެންކޯރެއް ދެމިއްޖެއެވެ.

މާތްވެގެންވާ ދެޙަރަމްފުޅުގެ މައުލޫމާތު ގެނެސްދޭ ޙަރަމައިންގެ ސޯޝަލް މީޑިއާ އެކައުންޓްތަކުން އިއްޔެ ވަނީ އުހުދު ފަރުބަދަމަތީގައި ފެން އާރެއް ދެމެމުން ދިޔަ މަންޒަރުގެ ވީޑިއޯ އާއްމުކޮށްފައެވެ. އުހުދު ފަރުބަދައަކީ އިސްލާމީ ތާރީހާއި ގުޅޭ ވަރަށް މުހިއްމު ފަރުބަދައެކެވެ.

އަރަބި ޖަޒީރާތަކަކީ ވާރޭ ވެހުން މަދު ސަރަހައްދެއް ނަމަވެސް މިފަހަކަށް އައިސް ބޯކޮށް ވާރޭ ވެހި ފެންބޮޑުވުމުގެ ހާދިސާތައް ދަނީ ހިނގަމުންނެވެ. ބޯކޮށް ވާރޭވެހުމުގެ ސަބަބުން ސަޢޫދީ އަރަބިއްޔާގެ އުތުރުގެ ސިޓީތަކުގައި ފެންބޮޑުވިއިރު މާތްވެގެންވާ ސިޓީ މަދީނާގެ ތެރޭގައިވެސް ވަރަށް ބޮޑަށް ފެން ބޮޑުވިއެވެ. އަދި ނަބިއްޔާގެ މިސްކިތް މަސްޖުލްނަބަވީ ހިމެނޭ ސަރަހައްދަށްވެސް ބޯކޮށް ވާރޭވެހި ފެންބޮޑުވުމާއި ކުރިމަތިލާން ޖެހުނެވެ.

ސަޢޫޑީ އަރަބިއްޔާގެ ރަސްމީ ފަރާތްތަކުން ބުނެފައި ވަނީ، ބޯކޮށް ވާރޭވެހި ފެންބޮޑުވުމުގެ މައްސަލަތަކައް ހައްލު ހޯދުމަށް މަސައްކަތް ކުރަމުންދާ ކަމަށެވެ. ޚަބަރުތައް ބުނާ ގޮތުގައި މޫސުމީ ބަދަލާއި ގުޅިގެން ބޯކޮށްވާރޭވެހި ފެންބޮޑުވެދާނެ ކަމަށް ބަލައި، ފެންހިންދާ ނިޒާމްތައް ސައޫދީ އަރަބިއްޔާގެ ސިޓީތަކުގައި އެކަށިގެންވާ ގޮތެއްގައި ޤާއިމްކުރެވިފައި ނެތުމަކީ ފެންބޮޑުވުމުގެ ސަބަބެވެ.

މެދުއިރުމަތީގެ ޤައުމުތަކަށް ކުރަމުންދާ ވިއްސާރައިގައި، މިދިޔަ މަހު، ދުބާއީގައިވެސް ވަނީ ވަރަށް ބޮޑަށް ފެންބޮޑުވެ ބޮޑެތި ގެއްލުންތަކެއް ލިބިފައެެވެ.