ރާއްޖެއަށް އައި ތުރުކީ ސިފައިންގެ މަނަވަރު --
ތުރުކީ ސިފައިންގެ އަސްކަރީ މަނަވަރެއް ރާއްޖެ އަތުވެއްޖެ
ތުރުކީ ސިފައިންގެ އަސްކަރީ މަނަވަރެއް މިއަދު މާލެއަށް ބަނދަރުކޮށްފިއެވެ.
އެމްއެންޑިއެފްއިން ވިދާޅުވީ، ތުރުކީ ސިފައިންގެ އަސްކަރީ މަނަވަރު ރާއްޖެއަށް އައިސްފައި ވަނީ ދެޤައުމުގެ އަސްކަރިއްޔާގެ ގުޅުން ބަދަހިކުރުމުގެ ދަތުރެއްގައި ކަމަށެވެ. މާލެއަށް މިއަދު ބަނދަރުކުރި ތުރުކީގެ އަސްކަރީ މަނަވަރުގެ ނަމަކީ، ޓީސީޖީ ކިނަލާޑާ (TCG Kınalıada) ކަމުގައި އެމްއެންޑީއެފުން ވަނީ ވިދާޅުވެފައެވެ.
އެހެން ނަމަވެސް މަނަވަރުގެ ސިފައިންނާއި ދިވެހި ސިފައިންގެ މެދުގައި ކުރިޔަށް ގެންދާނެ ހަރަކާތްތަކުގެ ތަފްސީލެއް އެމްއެންޑީއެފުން ހާމަކުރައްވާފައެއް ނުވެއެވެ.
ތުރުކިޔޭއަކީ، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުގެ ސަރުކާރުން ޚާއްޞަ ގޮތެއްގައި ޚާރިޖީ ގުޅުންތައ ްބަދަހިކޮށްފައިވާ ޤައުމެކެވެ. އެގޮތުން އެމަނިކުފާނު ވެރިކަމާއި ހަވާލުވެވަޑައިގެންނެވުމަށްފަހު ކުރެއްވި ފުރަތަމަ ފުރަމާނަ ދަތުރުފުޅު ތުރުކިޔޭއަށް ކުރެއްވި އިރު، ރާއްޖޭގެ އަސްކަރީ ޤާބިލްކަން އިތުރު ކުރެއްވުމަށް ތުރުކީ ސަރުކާރާއިއެކު މި ސަރުކާރުން ދަނީ މަސައްކަތް ކުރަމުންނެވެ.
މިގޮތުން ރާއްޖެ ސަރަހައްދު ބެލެހެއްޓުމަށް ހޯދާފައިވާ، ޑްރޯންތައްވެސް ގަނެފައި ވަނީ ތުރުކީންނެވެ. އަދި އެކަމާއި ގުޅޭ މަސައްކަތްތަކަށް ބޭނުންވާ މީހުން ބިނާކޮށް، ޤާބިލްކަން އިތިރުކުރެއްވުމަށް ދިވެހި ސިފައިންގެ އޮފިސަރުން ތުރުކީއަށް ފޮނުއްވައިގެން ގެންދަވަނީ ތަމްރީންތައް ދެއްވަމުންނެވެ.