ރ. ކުޑަކުރަތު ރިސޯޓުން ފުރައިގެން މާލެއަށް ދަތުރުކުރަނިކޮށް ބަންޑުން ޖަހާލި "ލިއޯ ޕާލް" ލޭންޑިންގ ކްރާފްޓުން ގެއްލުނު ބިދޭސީ މީހާ އޭގެ ދަށުން ފެނިފައިވާ ކަމުގައި އެމްއެންޑީއެފުން ވިދާޅުވެއްޖެއެވެ.

އެމްއެންޑީއެފުން ވިދާޅުވީ، ގެއްލުނު މީހާ، އޭނާ ހޯދުމުގައި މަސައްކަތް ކުރި އެމްއެންޑިއެފްގެ ކޯސްޓްގާޑުގެ ޑައިވަރުންނަށް ފެނިފައި ވަނީ، އެ އުޅަނދުގެ ދަށުން ކަމަށެވެ. ފެނުނު އިރު އެމީހާގެ އެއްވެސް ހަރަކާތެއް ނެތްކަމަށާއި އެމީހާ މިހާރު، ކ ކާށިދޫ ސިއްޙި މަރުކަޒަށް ގެންދިޔުމަށް މަސައްކަތް ކުރަމުންދާ ކަމުގައިވެސް އެމްއެންޑީއެފުން ވިދާޅުވިއެވެ.

އެމްއެންޑީއެފުން ވިދާޅުވީ، އެމީހާ މަރުވެފައިވާކަން ނުވަތަ ނޫންކަން ކަށަވަރުކޮށްދެވޭނީ ޑޮކްޓަރުން އެމީހާގެ ހަށިގަނޑު ބެއްލެވުމަށްފަހުގައި ކަމަށެވެ.

ރޭ މިހާދިސާ ހިނގި އިރު އެލޭންޑިންގ ކްރާފްޓްގައި ފަސް މީހުން ތިއްބެވެ. އޭގެ ތެރެއިން 4 މީހުން ފެނިފައި ވަނީ ކަނޑުމަތިން އޮޔާދަނިކޮށެވެ. އެހަތަރު މީހުން ވަނީ، ރޭ ފަތިހު ސީއެމްބިއުލޭންސް 21 އަށް ނަގާފައެވެ.

ހާދިސާ ހިނގި ގޮތާއި ގުޅޭ ގޮތުން މިހާތަނަށް އިތުރު ތަފްސީލެއް ލިބިފައެއް ނުވެއެވެ. އެހެން ނަމަވެސް މިދުވަސް ވަރަކީ ރާއްޖެއަށް މޫސުމް ވަރަށް ގޯސް ދުވަސްވަރެކެވެ.