ބ.ތުޅާދޫ، ތ.ވިލުފުށި އަދި ށ.ބިލެތްފަހީގައި އެއާޕޯޓް ހެދުމަށް ބިން ހިއްކުމުގެ މަސައްކަތް ކުންފުންޏަކާއި ހަވާލުކޮށްފިއެވެ.

މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގައި މިއަދު ބޭއްވި ރަސްމިއްޔާތުގައި މިމަޝްރޫޢުގެ އެއްބަސްވުންތަކުގައި ސޮއެކޮށްފައި ވަނީ، ކެޕިޓަލް މެރިން އެންޑް ސިވިލް ކޮންސްޓްރަކްޝަންއާއެކުގައެވެ.

މިއެއްބަސްވުމުގައި، ޕްލޭނިންގ މިނިސްޓްރީގެ ފަރާތުން ސޮއިކުރެއްވީ، އެ މިނިސްޓްރީގެ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. އަދި ކެޕިޓަލް މެރިން އެންޑް ސިވިލް ކޮންސްޓްރަކްޝަންގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ސިވަރާޖާ މަނިވައްނަންއެވެ.

މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ހާމަކުރައްވާފައިވާ ގޮތުގައި، އެކުންފުންޏާއި މި މަޝްރޫޢުތައް ހަވާލުކޮށްފައި ވަނީ، 280 ދުވަހުގެ ތެރޭގައި މަސައްކަތް ނިންމާގޮތަށް، 42.4 މިލިޔަން ޑޮލަރަށެވެ. 

މިމަޝްރޫޢުތަކުގެ ދަށުން، ޖުމުލަ، 157.3 ހެކްޓަރުގެ ބިން ހިއްކާނެއެވެ. އެއީ، ތ. ވިލުފުއްޓާއި، ށ. ބިލެތްފަހީގައި ކޮންމެ ރަށެއްގެ ފަޅުން، 56.34 ހެކްޓަރު އަދި، ތުޅާދޫފަޅުން، 44.7 ހެކްޓަރެވެ. 

ސަރުކާރުގެ ދަތުރުފަތުރުގެ ސިޔާސަތުގައި ކަނޑައަޅާފައި ވަނީ، ރާއްޖޭގެ މީހުން ދިރިއުޅޭ ކޮންމެ ރަށަކުންވެސް އެންމެ ގިނަ ވެގެން 20 މިނިޓްގެ ރާސްތާގައި ދެވޭ ހިސާބުގައި އެއާޕޯޓެއް އޮތުމަށެވެ.  މިގޮތުން ވިލުފުއްޓާއި، ތުޅާދޫ އަދި ބިލެތްފަހީގައި ތަރައްޤީކުރުމަށް ނިންމާފައި ވަނީ ޑޮމެސްޓިކް އެއާޕޯޓްތަކެކެވެ. މިވަގުތު ބ. އަތޮޅާއި، ތ އަތޮޅު އަދި ށ. އަތޮޅުން ކޮންމެ އަތޮޅެއްގައިވެސް އޮތީ އެންމެ އެއާޕޯޓެކެވެ.