ރާއްޖެއަށް މިހާރު ކުރަމުންދާ ވިއްސާރައިގައި މާލެ އަތޮޅު ގުރައިދޫއަށް ބޯކޮށް ވާރޭވެހި ފެންބޮޑުވެއްޖެއެވެ.

މިރޭ ގުރައިދޫއަށް ބޯކޮށް ވާރޭ ވެހުމުގެ ސަބަބުން ގިނަ ގެތަކަކަށް ފެންވަދެ ވަނީ ގެއްލުންތައް ލިބިފައެވެ. ގުރައިދޫން ވާހަކަ ދެއްކި ބައެއް މީހުން ބުނި ގޮތުގައި ބައެއް ސަރަހައްދުތަކުގައި 3 ފޫޓަށް ފެންގަނޑު ބޮޑުވިއެވެ. އަދި ބޮޑުވި ފެންގަނޑު ހިންދުމުގެ މަސައްކަތް ފުލުހުންނާއި ރައްޔިތުން އަދި ކައުންސިލުން ގުޅިގެން ދަނީ ކުރަމުންނެވެ.

ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ ވިދާޅުވީ، މިރޭ މާލެ އަތޮޅު ގުރައިދޫއަށް ބޯކޮށް ވާރޭ ވެހި ގިނަ ގެތަކަކަށް ފެންވަންނަމުންދާކަމަށެވެ. އަދި މިހާދިސާ އާއި ގުޅޭ ކަމާއި ގުޅޭ އިދާރާތަަކާއި މުއައްސަސާތަކާއި އެކު މަސައްކަތް ކުރަމުންދާ ކަމުގައިވެސް އެންޑީއެމްއޭއިން ވިދާޅުވިއެވެ.

ރާއްޖެއަށް މިހާރު ކުރަމުންދާ ވިއްސާރައިގައި ބޯކޮށް ވާރޭ ވެހުމުގެ ސަބަބުން މާލޭގެ މަގުތަކުގައިވެސް ވަނީ ފެންބޮޑުވެފައެވެ.

ރާއްޖެއަށް ކުރަމުންދާ ވިއްސާރައިގެ ސަބަބުން މިއަދު މުޅި ރާއްޖެއަށް މޫސުމާއި ބެހޭ ޤައުމީ އިދާރާއިން ވައިޓް އެލާޓް ނެރުނެވެ. އަދި މެންދުރު ފަހު 1:30 އިން ފެށިގެން މިރޭގެ މެންދަމު 1:00 އާއި ހަމައަށް ތިލަދުންމައްޗާއި ހައްދުންމައްޗާއި ދެމެދުގެ އަތޮޅުތަކާއި ރަށްތަކަށް މޫސުމާއި ބެހޭ އިދާރާއިން އޮތީ ވައިޓް އެލާޓް ނެރެފައެވެ.