ރައްޔިތުންގެ މަޖިލީހުގެ މިއަދުގެ ޖަލްސާގެ ތެރެއިން
އަށް ޤައުމަކަށް ކަނޑައެޅުއްވި ސަފީރުންނަށް މަޖިލީހުން މިއަދު ރުހުން ދެއްވައިފި
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރާއްޖެއިން 8 ޤައުމަކަށް ސަފީރުންގެ ގޮތުގައި ކަނޑައަޅުއްވުމަށް ނިންމަވާފައިވާ ބޭފުޅުންނަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
މިބޭފުޅުންނަށް މަޖިލީހުން ރުހުން ދެއްވާފައި މިވަނީ އެބޭފުޅުންނަށް ރުހުން ހޯއްދެވުމަށް އެބޭފުޅުންގެ ނަންތައް ރައްޔިތުންގެ މަޖިލީހަށް ފޮއްނުވާފައި ވާތާ، ގިނަ ދުވަސްތަކަކަށް ފަހުގައެވެ. އަދި މަޖިލީހުގެ ތަޅުމުގައި އެބޭފުޅުންނަށް ރުހުން ދިނުމުގެ ވޯޓުވެސް ނަގާފައި މިވަނީ، އެހުރިހާ ބޭފުޅުންނަށްވެސް ރުހުން ދެއްވުމަށް ކޮމިޓީން ފާސްކޮށްފައިވާތާ މަހެއްހާ ދުވަސްފަހުންނެވެ.
ސަފީރުކަމަށް ރުހުން ދެއްވި ބޭފުޅުންނަކީ؛
ދިވެހިރާއްޖެއިން އެކުވެރި ޢަރަބި އިމާރާތަށް ކަނޑައަޅުއްވާ ސަފީރުގެ މަޤާމަށް، މުޙައްމަދު ޙުސައިން ޝަރީފް
ދިވެހިރާއްޖެއިން ޖެނީވާއަށް ކަނޑައަޅުއްވާ ސަފީރުގެ މަޤާމަށް، ޑރ. ސަލްމާ ރަޝީދު
ދިވެހިރާއްޖެއިން އިނިގިރޭސި ކަނޑައަޅުއްވާ ސަފީރުގެ މަޤާމަށް، އިރުތިޝާމް އާދަމް
ދިވެހިރާއްޖެއިން ސިންގަޕޫރަށް ކަނޑައަޅުއްވާ ސަފީރުގެ މަޤާމަށް، މުޙައްމަދު ލުވައިޒް
ދިވެހިރާއްޖެއިން ބެލްޖިއަމްއަށާއި އީޔޫއަށް ކަނޑައަޅުއްވާ ސަފީރުގެ މަޤާމަށް، ގީލާ އަލީ
ދިވެހިރާއްޖެއިން މެލޭޝިޔާއަށް ކަނޑައަޅުއްވާ ސަފީރުގެ މަޤާމަށް، މަރިޔަމް ޝަބީނާ އަޙްމަދު
ދިވެހިރާއްޖެއިން ސްރީލަންކާއަށް ކަނޑައަޅުއްވާ ސަފީރުގެ މަޤާމަށް، މަސްޢޫދު ޢިމާދު
އެކުވެރި ދައުލަތްތަކުގެ ޖަމިއްޔާ އދ.އަށް ރާއްޖެއިން ކަނޑައަޅާ ދާއިމީ މަންދޫބުގެ މަޤާމަށް، ޢަލީ ނަސީރު މުހައްމަދު
ރައްޔިތުންގެ މަޖިލީހުން މިއަދު ސަފީރުކަމުގެ މަޤާމަށް ރުހުން ދެއްވި ގިނަ ބޭފުޅުންނަކީ މީގެ ކުރީގެ ސަރުކާރުތަކުގައިވެސް ސަފީރުކަމުގެ މަޤާމު ފުރުއްވި ބޭފުޅުންނެވެ.