ރޯޑް ޑިވެލޮޕްމަންޓް ކޯޕަރޭޝަން ލިމިޓެޑް (އާރުޑީސީ)ގެ ވެރިންގެ މައްޗަށް ތުހުމަތު ކުރެވޭ ޚިޔާނާތުގެ މައްސަލަ ނުބެލުމަށް ރައީސުލްޖުމްހޫރިއްޔާ އެންގެވިކަމަށް ބުނެ ބައެއް ފަރާތްތަކުން ފަތުރާފައިވާ ވާހަކަތައް ފުލުހުން ދޮގުކޮށްފިއެވެ.

ފުލުހުންގެ އިދާރާއިން ބުނީ،  އާރުޑީސީއާ ގުޅޭގޮތުން ފުލުހުން ތަހުގީގު ކުރަމުންގެންދާ މައްސަލަ ތަހުގީގު ކުރުމަށްޓަކައި ކުރަންޖެހޭ މަސައްކަތްތައް ދިވެހި ފުލުހުންގެ ޚިދުމަތުން ގެންދަނީ ކުރަމުންކަމަށެވެ. އަދި މި މައްސަލައިގެ ތަހުގީގާ ގުޅޭ އެއްވެސް މަޢުލޫމާތެއް، ތަހުގީގުގައި ބައިވެރިވާ އެއްވެސް ފަރާތަކުން ދިޔަރެސް ނޫހާއި ހިއްސާކޮށްފައި ނުވާކަމުގައިވެސް ފުލުހުންގެ އިދާރާއިން ވަނީ ބުނެފައެވެ.

ފުލުހުންގެ އިދާރާއިން ބުނީ، އެމައްސަލައާ ގުޅޭގޮތުން އެއްވެސް މައުލޫމާތެއް ހޯދުމަށް ދިޔަރެސް ނޫހުން އެދިފައި ނުވާކަމަށެވެ. އަދި މައުލޫމާތުގެ ސައްހަކަން ބެލުމަށް މަސައްކަތް ނުކޮށް، ފުލުހުން ހިންގާ ތަހުގީޤުތަކާމެދު ރައްޔިތުންގެ އިތުބާރު ގެއްލޭގޮތަށް، ދޮގު މައުލޫމާތު ފެތުރުމަކީ ކަންބޮޑުވާ ކަމެއް ކަމުގައިވެސް ފުލުހުންގެ ޚިދުމަތުން ވަނީ ބުނެފައެވެ.