ރައީސުލްޖުމްހޫރިއްޔާގެ އޮފީހުގައި ބާއްވާ ބައްދަލުވުންތަކަށް ވަޑައިގަންނަވާ ބޭފުޅުންނަށް، އެއޮފީހަށް ފޯނު ނުވެއްދޭ ގޮތަށް އޮންނަ އުސޫލުގެ ދަށުން ނޫސްވެރިންގެ ބައްދަލުވުންތަކަށް ހާޟިރުވާ ނޫސްވެރިންނަށްވެސް ކުރިޔަށް އޮތްތަނުގައި ނޫސްވެރިންގެ ބައްދަލުވުންތަކަށް ފޯނު ނުވެއްދޭނެ ކަމަށް ނިންމުމަށްފަހު އެނިންމުން ރައީސުލްޖުމްހޫރިއްޔާގެ އޮފީހުން ބަދަލުކޮށްފިއެވެ.

ރައީސުލްޖުމްހޫރިއްޔާގެ އޮފީހުގައި މިއަދު 11:00ގައި ބޭއްވުމަށް ހަމަޖެއްސި ނޫސްވެރިންނަށް ނޫސްވެރިންގެ ބައްދަލުވުމަށް ވަނުމުގެ ކުރިން ސެކިއުރިޓީއަށް ފޯނުތައް ހަވާލުކުރުމަށް އެންގިއެވެ. އެހެން ނަމަވެސް އެކަމާއި ގުޅޭ ގޮތުން ނޫސްވެރިން ކަންބޮޑުވުން ފާޅުކުރުމުން ނޫސްވެރިންގެ ބައްދަލުވުމަށް ފޯނު ވެއްދުމުގެ ހުއްދަ އެ އޮފީހުން ދިނެވެ. އެއާއި ގުޅިގެން ބައެއް މީޑިއާތަކުން ރިޕޯޓްކޮށްފައި ވަނީ، ނޫސްވެރިންގެ ބައްދަލުވުންތަކަށް، ނޫސްވެރިން ފޯނުވެއްދުން އެއޮފީހުން މަނާކޮށްފައިވާ ކަމަށެވެ.

އެހެން ނަމަވެސް އެ ޚަބަރަކީ ދޮގު ޚަބަރެއް ކަމުގައި ބުނެ، ޗީފް ސްޕޯކްސް ޕާސަން އާއި ހަވާލާދީ، ރައީސް އޮފީހުގެ ވެބްސައިޓްގައި ވަނީ ފަހުން ޚަބަރެއް ޝާއިއުކޮށްފައެވެ. އެޚަބަރުގައި ބުނެފައި ވަނީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރީންގެ ބައްދަލުވުމުގައި ބައިވެރިވާން އައި ނޫސްވެރީންނަށް ފޯނު ހިފައިގެން ރައީސް އޮފީހަށް ނުވަދެވުނުކަމަށް ބުނެ ފަތުރާ ޚަބަރަކީ ދޮގު ޚަބަރެއް ކަމަށެވެ.

Advertisement

ރައީސް އޮފީހުން ޝާއިޢުކުރި ޚަބަރުގައި ބުނެފައި ވަނީ، ރައީސުލްޖުމްހޫރިއްޔާގެ އޮފީހުގެ ސެކިއުރިޓީ ޕްރޮޓޮކޯލްގައި ޢަމަލުކުރަމުންދާ ޢާއްމު އުޞޫލަކީ އެކި ބައްދަލުވުންތަކަށް ވަޑައިގަންނަވާ ބޭފުޅުން، އެއީ ސަރުކާރުގެ ސިޔާސީ މަޤާމުތަކުގައި ތިއްބެވި ބޭފުޅުންކަމުގައި ވިޔަސް ސެކިއުރިޓީއާ ފޯނު ހަވާލުކުރަން ޖެހޭ ކަމަށެވެ. 

ރައީސުލްޖުމްހޫރިއްޔާގެ އޮފީހުން ޝާއިޢުކުރި މިޚަބަރުގައިވާ މައުލޫމާތަށް ބަލާއިރު، މިއަދު އޮތް ނޫސްވެރިންގެ ބައްދަލުވުމަށް ފޯނާއި އެކު ނޫސްވެރިން ނުވެއްދުމަށް ނިންމި ނިންމުމަށް މިހާރު މިވަނީ ބަދަލު ގެނެސްފައެވެ. އެއޮފީހުން އިތުރަށް ބުނެފައި ވަނީ، ނޫސްވެރީންގެ މަސައްކަތްތަކަށް ފަހިވެ ފަސޭހަވާނެގޮތަށް ކަންކަން ހަމަޖައްސައިދެމުން ގެންދިއުމަށް އަބަދުވެސް ސަރުކާރުން މަސައްކަތްކުރާނެކަމުގެ ފުރިހަމަ ޔަގީންކަން މި ފުރުޞަތުގައި އަރުވާ ކަމަށެވެ.

ރައީސް މައުމޫނުގެ ދައުރުގައި، ނޫސްވެރިންނަށްވެސް ރައީސް އޮފީހުގައި އޮންނަ ނޫސްވެރިންގެ ބައްދަލުވުންތަކާއި އެނޫންވެސް އެހެން ބައްދަލުވުންތަކަށް ވަންނަ އިރު ސެކިއުރިޓީއާ ފޯނު ހަވާލުކުރަން ޖެހޭ އުސޫލަކަށް އަމަލު ކުރަމުން އައެވެ. އެހެން ނަމަވެސް އޭގެ ފަހުން އައި ހުރިހާ ސަރުކާރު ތަކުގައިވެސް އަދި، މިސަރުކާރުން މިހާތަނަށް ބޭއްވި ނޫސްވެރިންގެ ބައްދަލުވުންތަކުގައިވެސް ނޫސްވެރިންނަށް ފޯނުވެއްދުމަށް ހުރަހެއް ނާޅައެވެ.

ރައީސުލްޖުމްހޫރިއްޔާގެ އޮފީހުގައި އޮންނަ ބައްދަލުވުންތަކަށް ހާޟިރުވާ ބޭފުޅުން އެއޮފީހުގެ ސެކިއުރިޓީއާއި ފޯނު ހަވާލު ކުރުމަށް އޮތް އުސޫލަކީ ވަރަށް ކުރިއްސުރެ އަމަލު ކުރަމުން އަންނަ އުސޫލެކެވެ. އަދި އެއުސޫލުގެ ދަށުން އެއޮފީހަށް ވަޑައިގަންނަވާ ބޭފުޅުން ދަބަހާއި ފޯނު ފަދަ ތަކެތި ރައްކާތެރި ކަމާއި އެކު އެ އޮފީހުގެ ރިސެޕްޝަން އޭރިއާގައި ބެހެއްޓޭ ގޮތަށް ލޮކަރުތައް ބަހައްޓާފައި ހުރެއެވެ.