ރައީސުލްޖުމްހޫރިއްޔާގެ އޮފީހުން ބާއްވާ ނޫސްކޮންފަރެންސްތަކަށް ވަންނަ ނޫސްވެރިން ފޯނު ވެއްދުން އަލުން މަނާކުރަން އުޅޭ ކަމުގެ އިޝާރާތެއް ރައީސް އޮފީހުން ކޮށްފިއެވެ.

ރައީސުލްޖުމްހޫރިއްޔާގެ އޮފީހަށް އެކި ބޭނުންތަކުގައި ޒިޔާރަތްކުރާ ފަރާތްތަކަށް، އެއޮފީހުގެ އެތެރެއަށް ފޯނު ވެއްދުން މަނާކޮށްފައި އޮތް އޮތުމަކީ، ވަރަށްކުރިއްސުރެ އަމަލު ކުރަމުން އައި އުސޫލެކެވެ. އެހެން ނަމަވެސް، ރައީސް ނަޝީދުގެ ދައުރުންފެށިގެން އައި ސަރުކާރުތަކުގައި ނޫސްވެރިން، ނޫސްކޮންފަރެންސްތަކަށް އެ އޮފީހަށް ވަންނައިރު، ފޯނު ވެއްދުން މަނާކޮށްފައި އޮތް އޮތުން އޮތީ ދޫކޮށްލާފައެވެ. އަދި މިދައުރުގައިވެސް ރައީސުލްޖުމްހޫރިއްޔާގެ އޮފީހުން އެންމެ ފުރަތަމަ ބޭއްވި ނޫސްވެރިންގެ ބައްދަލުވުންތަކަށް، ނޫސްވެރިން ފޯނު ވެއްދުން މަނާކޮށްފައެއް ނުވެއެވެ.

އެހެން ނަމަވެސް މިއަދުގެ 11:00ގައި ބޭއްވި ނޫސްވެރިންގެ ބައްދަލުވުމަށް ހާޟިރުވި ނޫސްވެރިންނަށް ފޯނު ނުވެއްދޭނެކަން އެއޮފީހުން އެއޮފީހުން އެންގިއެވެ. އެހެން ނަމަވެސް ނޫސްކޮށްފަރެންސަށް ހާޟިރުވި ނޫސްވެރިން އެކަމުގެ ކަންބޮޑުވުން ފާޅުކުރުމުން، ރައީސުލްޖުމްހޫރިއްޔާގެ އޮފީހުން ވަނީ، ނޫސްވެރިންނަށް ފޯނު ހިފައިގެން ނޫސް ކޮންފަރެންސް ބާއްވާ މާލަމަށް ވަނުމުގެ ހުއްދަ ދީފައެވެ.

މިއަދުގެ ނޫސްވެރިންގެ ބައްދަލުވުމުގައި ކުރިޔަށް ހުރި ނޫސްވެރިންގެ ބައްދަލުވުމަށް، ފޯނު ވެއްދޭނެތޯ ނޫސްވެރިން ކުރި ސުވާލުތަކަށް ރައީސުލްޖުމްހޫރިއްޔާގެ އޮފީހުގެ ސީނިއަރ ސްޕޯކްސްޕަރސަން ހީނާ ވަލީދު ސީދާ ޖަވާބެއް ނުދެއްވައެެވެ.

ރައީސް އޮފީހުގެ ކޮމިއުނިކޭޝަން ޑިޕާޓްމަންޓްގެ އިސްބޭފުޅުންވެ ވާހަކަތަކުން މިއަދު ދޭހަވީ، ރައީސުލްޖުމްހޫރިއްޔާގެ އޮފީހުގައި ބާއްވާ ނޫސްވެރިންގެ ބައްދަލުވުންތަކަށް ކުރިޔަށް އޮތް ތަނުގައި ދެން ނޫސްވެރިންނަށް ފޯނު ނުވެއްދޭނެ ކަމަށެވެ. އެހެން ނަމަވެސް އެކަމުގައި ސާފު ޖަވާބެއް އެއޮފީހުން މިއަދު ދީފައެއް ނުވެއެވެ.

ރައީސުލްޖުމްހޫރިއްޔާގެ އޮފީހުގައި ބާއްވާ ނޫސްވެރިންގެ ބައްދަލުވުންތަކަށް، ފޯނު ނުވެއްދޭނަމަ އެކަމަކީ، ކުރިއަރާފައިވާ މިޒަމާނާއި ގުޅޭ ކަމެއް ނޫންކަމާއި، ނޫސްވެރިންގެ މަސައްކަތްތައް ކުރުމަށް ފޯނަކީ ވަރަށް މުހިއްމު އެއްޗެއްކަން ފާހަގަކޮށް ނޫސްވެރިން އެކަމުގެ ކަންބޮޑުވުން ފާޅުކޮށްފައި ވެއެވެ.