ބެޔާ ލެވަކޫސެންގެ 120 އަހަރުވީ ދިގު ތާރީހުގައި އެ ޓީމުން އަލަށް މި ސީޒަނުގައި ލީގު ކާމިޔާބުކޮށްފައިވާއިރު، މި ހަނދާންތައް އެ ޓީމަށާއި، ކުޅުންތެރިންނާއި އަދި ހާއްސަކޮށް އެ ޓީމުގެ ކޯޗު، ޒަބީ އަލޮންސޯއަށް ވެގެންދާނީ މުޅި އުމުރު ދުވަހު ވެސް ހަނދާނުން ފޮހެވޭނެ ކަމަކަށް ނޫނެވެ. އެކަމުގައި ގިނަ ސަބަބުތަކެއް އެބައޮތެވެ.

އެކަމުގެ އެއް ސަބަބަކީ، މި ސީޒަނުގައި މިހާތަނަށް ބަލިނުވެ 46 މެޗު ލެވަކޫސެން ހަމަކޮށްފައިވުމެވެ. އޭގެ އިތުރުން، އިތުރު ވަގުތުގައި ލެވަކޫސެންއިން ބަދަލުކުރަމުންދާ ނަތީޖާތަކަކީ ވެސް، ބަލާލަން ހިއްގައިމު އަދި ފޯރިގަދަ މަންޒަރުތަކެކެވެ.

އެގޮތުން ބުންޑަސްލީގާގައި ހޮނިހިރު ދުވަހުގެރޭ ސްޓުޓްގާޓް އާއި ކުޅުނު މެޗުގައި 2-1 އިން ބަލިވެ، ލެވަކޫސެން ހިފަހައްޓަމުންދާ ރަން ރެކޯޑަށް ނިމުން އައުމަށް މަދު ސިކުންތު ކޮޅަކަށް ވެފައިވަނިކޮށް، އެ ޓީމުން މިވަނީ އަނެއްކާ ވެސް އިތުރު ވަގުތު ނަތީޖާ ބަދަލުކޮށްފައެވެ. މިއީ، މި ސީޒަނުގައި އެ ޓީމުން އިތުރު ވަގުތު ނަތީޖާ ބަދަލުކުރި 6 ވަނަ މެޗެވެ. މި 6 މެޗުގެ ތެރޭގައި ހިމެނެނީ، ނަތީޖާ ހަމަހަމަ ކުރުމަށް އިތުރު ވަގުތު ގޯލު ކާމިޔާބުކުރި 3 މެޗަކާއި، މެޗުން މޮޅުވުމަށް އިތުރު ވަގުތު ގޯލު ކާމިޔާބުކުރި 3 މެޗެކެވެ. އެއީ ޖުމްލަ 9 ޕޮއިންޓުގެ ވާހަކައެވެ.

ހޮނިހިރު ވަހުގެރޭ ކުޅުނު މެޗުގައި ލެވަކޫސެންއިން ފަހަތުން އަރާ ހަމަހަމަކުރީ، ސްޓުޑްގާޓުން 2 ގޯލު ޖަހާ، ރަގަޅު ލީޑެއް ނަގާފައިވަނިކޮށެވެ. ސްޓުޑްގާޓުގެ ގޯލުތައް 47 ވަނަ މިނެޓާއި 57 ވަނަ މިނެޓުގައި ފުރިޗް އަދި އުންޑޭވް ކާމިޔާބުކޮށްފައިވަނިކޮށް، ލެވަކޫސެންއަށް ނަތީޖާ ހަމަހަމަކޮށްދިނީ 61 ވަނަ މިނެޓުގައި އަޑްލީ ޖެހި ގޯލަކުންނާއި 6+90 ވަނަ މިނެޓުގައި އެންޑްރިޗް ކާމިޔާބުކުރި ގޯލަކުންނެވެ.

ލެވަކޫސަންއަށް އަދި ލީގުގައި ބާކީ 3 މެޗު އޮތް އިރު، ޔޫރޮޕާ ލީގުގެ ސެމީފައިނަލް މެޗުތަކާއި، ފުޓުބޯޅަ އެސޯސިއޭޝަން ކަޕްގެ ފައިނަލް މެޗުވެސް މި އަންނަ މެއި މަހު އޮންނާނެއެވެ. އެހެންކަމުން، މެއި މަހަކީ ސީޒަންގެ 3 ތަށި ކާމިޔާބު ކުރުމަށް އެ ޓީމަށް މުހިންމު ދުވަސްތަކެކެވެ.