ޤައުމީ އެއާލައިން މޯލްޑިވިއަންގެ ސީދާ ދަތުރުތައް އަލުން ސްރީލަންކާގެ ކޮލަމްބޯއަށް ފަށައިފިއެވެ.

މޯލްޑިވިއަންގެ މިދަތުރުތައް ފަށާފައި ވަނީ ރޭގައެވެ.

މޯލްޑިވިއަންއިން ހާމަކޮށްފައިވާ ގޮތުގައި، ކޮލަމްބޯ މާލެ ދަތުރުތައް އޮންނާނީ، ހަފްތާއަކު ދެ ދުވަހުގައެވެ. އެއީ ހަފްތާ ބަންދާއި ދިމާވާގޮތަށް ބާއްވާ ދަތުރުތަކެކެވެ. މިގޮތުން މޯލްޑިވިއަންގެ ދަތުރުތައް އޮންނާނީ، ހަފްތާގެ ބުރާސްފަތި އަދި ހޮނިހިރުގައެވެ.

މޯލްޑިވިއަންއިން ބުނީ، މޯލްޑިވިއަންގައި ކޮލަމްބޯއަށް ދަތުރުކުރާ ފަރާތްތަކަށް 165 ޑޮލަރާއި ހަމައަށް އަގު ހެޔޮކޮށް ޓިކެޓް ލިބޭނެ ކަމަށެވެ. މީގެ އިތުރުން މީލް ޕެކް އަކާއި، 30 ކިލޯގެ ހިލޭ ލިބޭނެއެވެ.

މޯލްޑިވިއަންއިން ކޮލަމްބޯއަށް ކުރާ ދަތުރުތަކުގައި ބޭނުން ކުރާނީ، އެކުންފުނީގެ އެއާބަސް އޭ320 މަރުކާގެ ބޮޑު ބޯޓެވެ.

މޯލްޑިވިއަންގެ ދަތުރުތައް ކޮލަމްބޯއަށް އަލުން ފެށުން ފާހަގަ ކުރުމަށް ބަންޑާރަނައިކެ އިންޓަނޭޝަނަލް އެއާޕޯޓުގައި ވަނީ ޚާއްޞަ ހަރަކާތްތަކެއް ކުރިޔަށް ގެންގޮސްފައެވެ.