އައްޑޫ ސިޓީއަށް މިހާރ ކުރަމުންދާ ވިއްސާރައިގައި ފެންބޮޑުވެ، 2 ގެއެއްގެ މީހުން ވަގުތީ ހިޔާތަކަށް ބަދަލުކޮށްފައިވާ ކަމުގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެންޑީއެމްއޭއިން ވިދާޅުވެއްޖެއެވެ.

އެންޑިއެމްއޭއިން ވިދާޅުވީ އައްޑުއަށް ކުރަމުންދާ ވިއްސާރައިގައި 40 ވުރެ ގިނަ ގޭގެއަށް ފެންވަދެ، ގެއްލުންތައް ލިބިފައިވާ ކަމަށެވެ. އަދި 5 ގެއެއްގައި މީހުންނަށް ދިރި ނޫޅެވޭ ވަރުވެ އެގޭގޭގެ މީހުން އެގެން ގެތަކަށް ބަދަލުކުރަން ޖެހުނު ކަމަށާއި، އޭގެ ތެރެއިން 3 ގެއެއްގެ މީހުން އާއިލީ އެހެން ގެތަކަށް ބަދަލުވެފައި ވާއިރު، ދެ ގެއެއްގެ މީހުނަށް ވަގުތީ ބޯހިޔާވަހިކަން ހަމަޖައްސައިދީފައިވާ ކަމަށެވެ.

އެންޑީއެމްއޭއިން ވިދާޅުވީ، އައްޑޫ ސިޓީއަށް ކުރަމުންދާ ވިއްސާރައިގަ އެސިޓީގައި ފެންބޮޑުވެ ބައެއްގޭގެއަށް  އަސަރުކުރަމުންދާތީ، އެހީތެރިކަން ބޭނުންވާ ފަރާތްތަކަށް އެހީ ފޯރުކޮށް ފިނުމުގެ މަސައްކަތް ކުރަމުން ގެންދާ ކަމަށެވެ.

މޫސުމާއި ބެހޭ ޤައުމީ އިދާރާއިން ހާމަކޮށްފައިވާ ގޮތުގައި 24 ގަޑި އިރުގެ ތެރޭގައި އައްޑޫ ސިޓީއަށް ވަނީ، 167.7 މިލިލީޓަރުގެ ވާރޭ ވެހިފައެވެ.

އައްޑޫ ސިޓީއަށް ކުރަމުންދާ ވިއްސާރައިގައި އެންމެ ބޮޑަށް ފެންބޮޑުވެފައި ވަނީ އެސިޓީގެ ފޭދޫގައެވެ.