މުސްލިމުންގެ އެންމެ މުގައްދަސް ދެ ބިން ކަމުގައިވާ މައްކާ އާއި މަދީނާ، އަދި މުސްލިމުންގެ ޤިބުލަ ހުންނަ ސައުދީ އަރަބިއްޔާގައި ބަނގުރާ ވިއްކާ ފިހާރައެއް ހުޅުވައިފިކަމަށް އަޑު ފެތުރިއްޖެއެވެ. މި ފިހާރަ ހުޅުވާފައިވަނީ އެ ގައުމުގެ ވެރިކަންކުރާ ރިޔާލުގެ ޑިޕްލޮމެޓިކް ކުއާޓާގައިކަމަށް ރިޕޯޓުތައް ބުނެއެވެ.

މި ފިހާރައިގެ ގަވާއިދުތައް ބުނާގޮތުން، މިހާރައިން ވިޔަފާއި ކުރެވޭނީ ޑިޕްލޮމެޓުންގެ ތެރެއިން މުސްލިމް ނޫން މީހުނަށެވެ. އަދި ބަނގުރާ ގަތުމުގެ ކުރިން "ޑިޕްލޯ" ކިޔާ އެޕްލިކޭޝަނެއް ބޭނުންކޮށްގެން، މި ވިޔަފާރި މުއާމަލާތުގެ ހުއްދަ ހޯދަންޖެހެއެވެ. މީގެ އިތުރުން، މި ފިހާރައިގައި ފޮޓޯ ނެގުން މަނާ ކުރުމުގެ ގޮތުން ފޯނު ބޭނުންކުރުމާއި، 21 އަހަރުން ދަށުގެ މީހުން ފިހާރައަށް ވަނުން ވެސް ވަނީ މަނާކޮށްފައެވެ.

ޑިޕްލޯ އެޕްލިކޭޝަނަކީ ސައުދީގެ ޒަކާތް، ޓެކްސް އެންޑް ކަސްޓަމްސް އޮތޯރިޓީއިން ޑިޕްލޮމެޓިކް މިޝަންތަކާއެކު ވިޔަފާރީގެ މުއާމަލާތްތައް ހިންގުމަށް ހަދާފައިވާ އެޕްލިކޭޝަނެއްކަމަށް، އެޕް ސްޓޯރުން އެނގެއެވެ. މި އެޕްލިކޭޝަން މެދުވެރިކޮށް، ފިހާރައިން ބަނގުރާ ވިއްކާ މިންވަރު ވެސް ވަނީ ކޮންޓްރޯލްކޮށްފައެވެ. އެގެތޮން، ކޮންމެ މަހަކުވެސް ކޮންމެ މީހަކަށް ބަނގުރާ ގަތުމަށް ވަކި ކޯޓާއެއް އިނދެއެވެ.

ސައުދީއިން މި ފިހާރަ ހުޅުވުމާ ގުޅިގެން ގިނަ ފަރާތްތަކުން ބުނަމުން ގޮތުގައި، މިއީ އެ ގައުމުގެ އިގްތިޞާދު ސިންދަފާތު ކުރުމުގެ މަސައްކަތުގެ ތެރެއިން ކުރެވިގެން ދިޔަ ކަމެކެވެ. އަދި، މިވަގުތު ހަމައެކަނި ޑިޕްލޮމެޓުންނަށް ބަނގުރާ ވިއްކިނަމަވެސް، ސައުދީގައި މަސައްކަތްކުރާ ބިދޭސީންނާއި ޓުއަރިސްޓުންނަށް ލިބޭނެ ގޮތަށް ފަހުން މި ވިޔަފާރި ފުޅާކުރާނެކަމަށް ބެލެވޭކަމަށް، ގިނަ ބަޔަކު އަންނަނީ ބުނަމުންނެވެ.

ސައުދީއިން ބަނގުރާ ވިއްކާ ފިހާރައެއް ހުޅުވުމަށް ނިންމި އެއް ސަބަބަކީ، ޑިޕްލޮމެޓުން އެ ގައުމަށް ބަނގުރާ އެތެރެކޮށް، ކަޅު ބާޒާރުގައި އޭގެ ވިޔަފާރިކުރާތީ އެކަން ހުއްޓުވުމަށްކަމަށް، ނަން ހާމަކުރުން މަނާކޮށް ޑިޕްލޮމެޓަކު މައުލޫމާތު ދީފައިވާކަމަށް ވެސް ރިޕޯޓުތަކުގައި ވެއެވެ.

ސައުދީގެ ރަސްކަމުގެ ތަހުތަށް މުޙައްމަދު ބިން ސަލްމާން އައުމަށްފަހު، އެ ގައުމުގެ އިގްތިޞާދު ސިންދަފާތު ކުރުމަށްކަމަށް ބުނެ، އެ ގައުމުގައި އަންނަނީ ކުރިން ހުއްދަނުކުރާ ގިނަ ކަންތައްތަކެއް ހުއްދަ ކުރަމުންނެވެ. އޭގެ ތެރޭގައި އަންހެނުން ކާރު ދުއްވުމާއި، ސިނަމާތަކާއި ކޮންސާޓް ހޯލްތައް ހިންގުމަށް ހުއްދަ ދިނުން ވެސް ހިމެނެއެވެ.