ސްކައި ޑައިވް ކުރުމަކީ މަޖާ ކުޅިވަރެއް ނަމަވެސް އެކުޅިވަރުގައި އެތައް ބައެއްގެ ފުރާނަވެސް ވަނީ ގެއްލިފައެވެ. 

އިވާން ލެސްޓާ މެކްގިއާ އަކީ، ތަޖުރިބާކާރު ސްކައިޑައިވަރެކެވެ. 1988 ވަނަ އަހަރުގެ އޭޕްރީލް މަހުގެ 2 ވަނަ ދުވަހު އެހެން އިންސްޓްރަކްޓަރަކާއި ދަރިވަރެއް ހިމެނޭ ޓެންޑަމް ޖަމްޕެއް، ވީޑިއޯ ކުރުމަށް އިވާން ލެސްޓާވެސް އެމީހުންނާއި އެކު މަތިންދާ ބޯޓުން ފުންމާލީ އެތައް ހާސް ފޫޓެއްގެ މަތިންނެވެ. އެއީ އެދުވަހު އޭނާކުރި 3 ވަނަ ސްކައިޑައިވްއެވެ.

އެ އިންސްޓްރަކްޓަރާއި އޭނާގެ ދަރިވަރު، ތިރިއަށް އަންނަމުން ދިޔައިރު އެމަންޒަރު ރެކޯޑް ކުރަމުން ދިޔައީ، އިވާން ލެސްޓާއެވެ. ބޯޓުން ފުންމާލައިގެން އެތައްހާސް ފޫޓެއްގެ ތިރިއަށް ވެއްޓެމުން ދިޔައިރުވެސް އޭނާގެ އަތުގައި ވައިކުޑަ ނެތްކަން އޭނާއަކަށް ނޭނގެއެވެ.

Advertisement

ފުންމާލެވުނީ ވައިކުޑަ ނުލައިކަން އިވާންއަށް އެނގުނީ، އިންސްޓްރަކްޓަރު އޭނާގެ ޕެރަޝޫޓް ނުވަތަ ވައިކުޑަ ހުޅުވުމުންނެވެ. އޭނާ ރެކޯޑް ކުރި ވީޑިއޯގައި، އެންމެ ފަހު ޖުމްލައަކަށް އޭނާ ބުނާ އަޑު އިވެނީ، "އޯ މައިގޯޑް. ނޯ"އެވެ.

އެދުވަސްވަރަކީ، މިހާރު މިހުންނަ ކަހަލަ ކުދި އަދި ލުއި ކޮލިޓީ ކެމެރާތައް ހުރި ޒަމާނެއް ނޫނެވެ. އިވާން ލެސްޓާ އެމަންޒަރު ރިކޯޑް ކުރުމަށް ބަރު ކެމެރާ އާއި އެކު ފުންމާލުމުގެ ބޭނުމަކީ، ސްކައި ޑައިވްކުރަން ދަސްކޮށްދީ ކިޔަވައިދިނުމުގައި ބޭނުން ކުރާނޭ ވީޑިއޯއެއް ތައްޔާރު ކުރުމެވެ.

ސްކައިޑައިވަރުން ބޯޓު ދޫކޮށް ފުންމާލާއިރު އޭނާގެ އަތުގައި ވައިކުޑަ އޮތްކަން ޕައިލެޓް ކަށަވަރު ކުރަން ޖެހެއެވެ. އެހެން ނަމަވެސް އިވާންގެ ބެކްޕެކަކީ ވީޑިއޯ ރެކޯޑް އިކްއިޕްމެންޓް ބެކްޕެކް ކަމާއި، އެއީ ވައިކުޑަ ނޫންކަން ޕައިލެޓަށްވެސް ފާހަގަ ނުކުރެވި، އެންމެ ފަހުން ނިންމާފައި ވަނީ އެއީ އެކްސިޑެންޓެއް ކަމަށެވެ.

ވައިކުޑަ ނެތި އެހާމަތިން ފުންމާލުމުގެ ސަަބަބުން އިވާން ލެސްޓާ ބިމުގައި ޖެހި ވަގުތުން މަރުވިއެވެ. މިހާދިސާ ހިނގީ 2 އޭޕްރީލް 1988 ގައި އެމެރިކާގެ ނޯތުކރޮލައިނާގެ ފްރެންލިން ކައުންޓީ ސްޕޯޓްސް ޕެރަޝޫޓް ސެންޓަރުގެ މަތިންނެވެ. އޭނާ މަރުވިއިރު އޭގެ ކުރިން 800 ވުރެ ގިނަ ސްކައިޑައިވް ކާމިޔާބުކަމާއި އެކު ނިންމާލާފައިވެއެވެ.