ދިވެހިރާއްޖޭގެ ޤައުމީ ޔުނިވަރސިޓީގައި ކިޔަވަމުންދާ ދަރިވަރުން، ދަރުމަވަންތަ ހޮސްޕިޓަލުން ނެރެ، އެޔުނިވަރސިޓީގެ މަިއ ކެމްޕަހަށް ބަދަލުކުރުމުން، އެމްއެންޔޫގެ ދަރިވަރުންގެ ޔޫނިއަންއިން ކަންބޮޑުވުން ފާޅުކޮށްފިއެވެ.

އެކަމާއި ގުޅިގެން ދަރިވަރުންގެ ޔޫނިއަންއިން މިރޭ ނެރުނު ނޫސް ބަޔާނުގައި ބުނެފައި ވަނީ، އެބަދަލާއި ގުޅިގެން ޔުނިވަސިޓީގައި ކިޔަވަމުންދާ 1000 ވުރެ ގިނަ ދަރިވަރުންގެ ކިޔެވުމަށް އަސަރުކުރާނެ ކަމަށެވެ. ދަރިވަރުންގެ ޔޫނިއަންއިން ނެރުނު ނޫސްބަޔާނުގައި، ސްކޫލް އޮފް މެޑިސިންގައި 7 ބެޗެއްގައި 200 ވުރެ ގިނަ ދަރިވަރުން ކިޔަވަމުންދާކަންވެސް ވަނީ ފާހަގަކޮށްފައެވެ. އަދި މިކަން މިގޮތަށް ކުރުމާއި ގުޅިގެން ޔުނިވަރސިޓީގެ މެނޭޖްމަންޓާއި ސްކޫލް އޮފް މެޑިސިންގެ ދަރިވަރުން ބައްދަލުކޮށްފައިވާ ކަމުގައިވެސް އެބަޔާނުގައި ބުނެފައިވެއެވެ.

މީގެ އިތުރުން އެމައްސަލައިގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއި ވެސް ބައްދަލުކުރުމަށް މަސައްކަތް ކުރަމުންދާ ކަމަށާއި މަޝްވަރާގެ އުސޫލުން އެކަމަށް އެދެވޭ ޙައްލެއް ހޯދުމަށް މަސައްކަތް ކުރަމުންދާކަމުގައިވެސް ދަރިވަރުންގެ ޔޫނިއަންއިން ބުނެފައިވެއެވެ.

Advertisement

އެޔޫނިއަންއިން ބުނީ، ސްކޫލް އޮފް މެޑިސިންގެ ދަރިވަރުންނަށް ޚާއްޞަކޮށް އެޅުމަށް ހަމަޖެހިފައިވާ ޓީޗިން ހޮސްޕިޓަލްގެ މަސައްކަތް އަވަހަށް ނިންމޭނެ ގޮތްތަކެއް ހޯދައިދީ، އެކަމަށް ދާއިމީ ހައްލެއް ހޯދައިދިނުމަކީ ދަރިވަރުންގެ ފަރާތުން އެދޭކަމެއް ކަމަށެވެ. 

ދަރުމަވަންތަ ހޮސްޕިޓަލްގައި ހިންގަމުން އައި ސްކޫލް އޮފް މެޑިސިން އެތަނުން ބަދަލުކުރަން ނިންމި އިރު، އެ ހޮސްޕިޓަލުގެ އިމާރާތުގައި، މެޑިސިންގ ސްކޫލް ހިންގަން ފެށީ، 10 އަހަރު ދުވަހުގެ އެއްބަސްވުމެއްގެ ދަށުންނެވެ. އެހެން ނަމަވެސް އެތަން ހުސްކުރާ ސަބަބެއް އައިޖީއެމްއެޗްއިން ހާމަކޮށްފައެއް ނުވެއެވެ.