އޮކްޓޫބަރު މަހުގެ 7 ވަނަ ދުވަހު، ހަމާސްގެ މުޖާހިދުން، އިޒްރޭލުގައި ކުރިޔަށް ދިޔަ ނޯވާ މިޔުޒިކް ފެސްޓިވަލަށް ދިން ހަމަލާއިން ސަލާމަތް ވި  މީހުންގެ ތެރެއިން ގިނަ އަދަދެއްގެ މީހުން، އެކި އެކި ނަފްސާނީ މައްސަލަތަކުގައި އަމިއްލައަށް މަރުވަމުންދާކަމަށް ރިޕޯޓްތައް ބުނެފިއެވެ.

އިޒްރޭލުގެ މީޑިއާގެ ކަމުގައިވާ އައި ޓްވެންޓީފޯރ ނިއުސްއިން ރިޕޯޓްކޮށްފައިވާ ގޮތުގައި، ނޯވާ މިޔުޒިލް ފެސްޓިވަލްގެ ހަމަލާއަށް 6 މަސްވެގެން ދިޔައިރު، އެހަމަލާއިން ސަލާމަތްވި 50 ވުރެ ގިނަ މީހުން ވަނީ އެމީހުންނަށް ކުރިމަތިވި ނަފްސާނީ މައްސަލަތަކުގައި އަމިއްލައަށް މަރުވެފައެވެ.

ނޯވާ ފެސްޓިވަލްގެ ހަމަލާއިން ސަލާމަތްވި ބެން ޝިމޮން ނަމަކަށް ކިޔާ މީހަކު، އެހަމަލާ އާއި ގުޅޭ ގޮތުން އިޒްރޭލު ޕާލަމެންޓްގައި ބުނީ، ހަމަލާއަށް ފަހު ނަފްސާނީ މައްސަލަތަކާއި ކުރިމަތިވި ބައެއް މީހުންނަށް ގަދަކަމުން ހޮސްޕިޓަލުގައި އެޑްމިޓްކޮށް ފަރުވާ ދީފައިވާ ކަމަށެވެ. އަދި ހަމަލާގެ ބިރުވެރިކަމުގެ ސަބަބުން ނަފްސާނީ ހާލަތު ގޯސްވި މީހުންގެ ތެރޭގައި އޭނާވެސް ހިމެނޭ ކަމުގައި ބުނެފައިވެއެވެ.

Advertisement

ނޯވާ ފެސްޓިވަލަށް ދިން ހަމަލާގައި 364 މީހުން މަރުވި އިރު، އެހަމަލާގެ ސަބަބުން މުޅި އިޒްރޭލުގެ ތެރޭގައި ނަފްސާނީ ބިރުވެރިކަން ވަނީ ފެތުރިފައެވެ. އައި ޓްވެންޓީފޯރ ނިއުސްއިން އަންދާޒާކޮށްފައިވާ ގޮތުގައި، އޮކްޓޫބަރު 7ގައި ނޯވާ މިޔުޒިކް ފެސްޓިިވަލަށް ދިން ހަމަލާއަށް ފަހު، އެކިއެކި ނަފްސާނީ މައްސަލަތައް ކުރިމަތިވި އިޒްރޭލު މީހުންގެ އަދަދު 6 ލައްކައަށް ވުރެ މައްޗަށް އަރާނެއެވެ. އެހަމަލާއަށް ފަހު، އިޒްރޭލުން ހިފާފައިވާ ބިންތަކުގައި ވަޒަންވެރި ކުރުވާފައިވާ އެތައް ބަޔަކުވެސް ވަނީ އިޒްރޭލު ދޫކޮށް ގޮސްފައެވެ.

އިޒްރޭލުގައި ދިރިއުޅޭ މީހުންގެ ތެރޭގައި ނަފްސާނީ މައްސަލަތައް ހުންނަ މީހުންގެ އަދަދު އިތުރު ނަމަވެސް އެޤައުމު ހިމަނާފައި ވަނީ، ދުނިޔޭގެ އެންމެ އުފާވެރި ޤައުމުތަކުގެ ރޭންކުގެ 4 ވަނައިގައެވެ.