ކުރީގެ ނައިބު ރައީސް އަހްމަދު އަދީބު ބޭސްފަރުވާއަށް ސިންގަޕޫރަށް ފުރާވަޑައިގެންފިއެވެ.

އަދީބު އުފައްދަވާފައިވާ ސިޔާސީ ޕާޓީ އެމްޓީޑީން ހާމަކޮށްފައިވާ ގޮތުގައި އަދީބު ބޭސްފަރުވާއަށް ސިންގަޕޫރަށް ފުރާވަޑައިގެންފައި ވަނީ ރޭގައެވެ. އެޕާޓީން ބުނެފައި ވަނީ އަދީބު ފަރުވާ ހޯއްދަވަމުން ގެންދަވަނީ ފުރާނައަށް ނުރައްކާވާފަދަ ނާރުގެ އާލާސްކަންފުޅަަކަށެވެ. އަދި ބޭސްފަރުވާއަށް އެމަނިކުފާނު ރާއްޖެއިން ބޭރަށް ފުރާވަޑައިގެންފައި ވަނީ، ރާއްޖެއިން ހެދެން ނެތް ޓެސްޓްތަކެއް ހެއްދެވުމަށް ޑޮކްޓަރުން ލަފާ ދެއްވާފައިވާތީ، މޯލްޑިވްސް ކަރެކްޝަނަލް ސަރވިސްގެ ހުއްދަ އާއެކުގައެވެ. ކަރެކްޝަންސްއިން އަދީބަށް ރާއްޖެއިން ބޭރަށް ދިޔުމަށް ހުއްދަ ދެއްވާފައި ވަނީ 10 ދުވަހުގެ މުއްދަތަށެވެ. އަދި އަދީބާއިއެކު ސެކިއުރިޓީންވެސް ވަނީ ފޮނުވާފައެވެ.

ބޭރަށް ފުރާވަޑައިގެންނެވި އިރު އަދީބުގެ އާލާސްކަންފުޅު ގޯސްވެ އައިޖީއެމް ހޮސްޕިޓަލްގައި އެމަނިކުފާނަށް އައީ ފަރުވާ ދެއްވަމުންނެވެ.

އެމްއެމްޕީއާރްސީގެ ޚިޔާނާތުގެ ކުށް ސާބިތުވެ އަދީބުގެ މައްޗަށް ވިހިއަހަރަށްވުރެ ގިނަ ދުވަހުގެ ޖަލު ޙުކުމް އިއްވާފައި ވީނަމަވެސް، އަދީބު ގޭބަންދަށް ބަދަލުކޮށްފައި ވަނީ ވެސް އާލާސްކަންފުޅާއި ގުޅިގެން ޑޮކްޓަރުންގެ ލަފަޔާއިއެކުގައެވެ.