ރައްޔިތުންގެ މަޖިލީހާއި އެމަޖިލީހުގެ މެމްބަރުންނާއި މެދު ރައްޔިތުންގެ ޝަކުވާތައް ގިނައެވެ. މީގެ ކުރިން ދެ ފަހަރެއްގެ މަތިން އޭރު ވެރިކަމުގައި އޮތް ޕާޓީއަކަށް މަޖިލީހުގެ މެޖޯރިޓީ ދިން ނަމަވެސް ރައްޔިތުން އުއްމީދު ކުރާ ނަތީޖާއެއް ނުފެނުނެވެ. އެއަށްވުރެ ބޮޑަށް މަޖިލިސް ފެނިގެން ދިޔައީ ސިޔާސީ ގޮތުން ހަލަބޮލިވެގެން ދިޔަ ތަނެއްގެ ގޮތުގައެވެ.

މަޖިލީހުގެ މެމްބަރުންނަށް މަޖިލީހުގެ ތަޅުމުގައި ލިބޭ ހައްދެއް އިމެއް ނެތް އިމްތިޔާޒު ތަކާއި އެކު މަޖިލީހުގެ ތަޅުމުގައި މެމްބަރުން ގެންދިޔައީ ހިތުހުރި ގޮތަކަށް ވާހަކަތައް ދައްކަމުންނެވެ. ގޭގެ ސިޓިންގ ރޫމްތަކުގައި ތިބެ ދަރިންނާއި މައިންބަފައިން އަޑުއަހަން ނުކެރޭ ފަދަ ހަޑިހުތުރު ބަސްތައް ބޭނުން ކުރަމުންނެވެ. އޭގެ ނަތީޖާއަކީ، ދިވެހި ވެރިކަމުގެ ތިންބާރުގެ ތެރެއިން އެއްބާރު ކަމުގައިވާ ރައްޔިތުންގެ މަޖިލީހަށް ރައްޔިތުންގެ ހިތްތަކުގައި އޮތް ޤަދަރު ކުޑަވެ، އެތަނަކީ، "ބކރކއޓ"ގެ ގޮތުގައި ސޯޝަލް މީޑިއާ އާއި އެހެނިހެން މަންސަ ތަކުގައި ރައްޔިތުން ސިފަ ކުރަން ފެށުމެވެ.

18 ވަނަ ރައްޔިތުންގެ މަޖިލީހާއި ޚިލާފަށް، 19 ވަނަ ރައްޔިތުންގެ މަޖިލީހުގައި ހަލަބޮލިކަން ކުޑަވި ނަމަވެސް، 19 ވަނަ ރައްޔިތުންގެ މަޖިލިސް ވެސް ވެގެންދިޔައީ، ރައްޔިތުން ބޭނުންވާ ނަތީޖާ ނެރެ ނުދެވުނު މަޖިލީހަކަށެވެ. އެހެންވެ 19 ވަނަ ރައްޔިތުންގެ މަޖިލީހުގައި ތިއްބެވި ގިނަ މެމްބަރުންތަކެއް 20 ވަނަ ރައްޔިތުންގެ މަޖިލީހަށް ކުރިމަތި ލެއްވި ނަމަވެސް އެބޭފުޅުންނަކަށް ކާމިޔާބެއް ނުވިއެވެ. މެދު ނުކެނޑި 20 އަހަރު މެމްބަރުކަން ކުރެއްވި ބޭފުޅުންނާއި، 15 އަހަރު މެމްބަރުކަން ކުރެއްވި މެމްބަރުންނާއި، 10 އަހަރު މެމްބަރުކަން ކުރެއްވި ބޭފުޅުންނާއި އެއްދައުރު ފުރިހަމަކުރި މެމްބަރުންވެސް ރައްޔިތުން ވޯޓު ނުދީ ފެއިލްކޮށްލިއެވެ. އޭގެ ތެރޭގައި މަޖިލީހުގެ ރައީސް މުހައްމަދު އަސްލަމާއި، އީވާ އަބްދުﷲ އާއި އިމްތިޔާޒް ފަޙްމީ އާއި، މުހައްމަދު ރަޝީދު ޙުސައިން އާއި، އަޙްމަދު ސަލީމް ފަދަ ބޭބޭފުޅުންވެސް ހިމެނެއެވެ.

19 ވަނަ ރައްޔިތުންގެ މަޖިލީހުގެ މެމްބަރުންގެ ތެރެއިން 20 ވަނަ ރައްޔިތުންގެ މަޖިލީހުގެ ގޮނޑި ކާމިޔާބު ކުރެއްވުނީ، 11 ބޭފުޅުންނަށެވެ. އެއީ؛

1- މީކާއީލް ނަސީމް - ގަލޮޅު ދެކުނު ދާއިރާ

2-ޢަބްދުލް ޣަފޫރް މޫސާ - ހަނިމާދޫ ދާއިރާ

3- ޙުސައިން ޒިޔާދު - ވައިކަރަދޫ ދާއިރާ

4- އަޙްމަދު ސަލީމް - އޭދަފުށީ ދާއިރާ

5- އިބްރާހިމް ނަސީމް - ތުލުސްދޫ ދާއިރާ

6- ހަސަން ޒަރީރު - މަތިވެރި ދާއިރާ

7- ޤާސިމް އިބްރާހީމް - މާމިގިލީ ދާއިރާ

8- އަޙްމަދު ޠާރިޤު - މަހިބަދޫ ދާއިރާ

9- މުޙައްމަދު ނާޒިމް - ދަނގެތީ ދާއިރާ

10- އަޙްމަދު ޝިޔާމް މުޙައްމަދު - މީދޫ ދާއިރާ

11- އިބްރާހީމް ނާޒިލް - ހިތަދޫ ދެކުނު ދާއިރާ

20 ވަނަ ރައްޔިތުންގެ މަޖިލީހަށް، ހޮވުނު މެމްބަރުންގެ ތެރޭގައި 18 ވަނަ ރައްޔިތުންގެ މަޖިލީހުގައި މެމްބަރުކަން ކުރައްވައި، ނާކާމިޔާބުވި މެމްބަރުންވެސް ހިމެނިވަޑައިގަންނަވައެވެ. އޭގެ ތެރޭގައި ޢަބްދުއްރަޙީމް ޢަބުދުﷲ އާއި، މުޙައްމަދު ޝާހިދު އާއި، އަސްމާ ރަޝީދު ފަދަ ބޭބޭފުޅުން ހިމެނިވަޑައިގަންނަވާއިރު، 20 ވަނަ ރައްޔިތުންގެ މަޖިލީހުގެ މެޖޯރިޓީއަކީ، މުޅިން އަލަށް މަޖިލީހުގެ މެމްބަރުކަމަށް އިންތިޚާބުވެވަޑައިގެންނެވި ބޭފުޅުންނެވެ.