ނިމެމުން މިދާ ރައްޔިތުންގެ މަޖިލީހުން ނިންމުންތައް ނިންމުން ދެެން މަޑުޖައްސާލަން ޖެހޭ ކަމުގައި ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމް މިއަދު ވިދާޅުވެއްޖެއެވެ.

ޢަލީ އާޒިމް މިހެން ވިދާޅުވީ، މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި، ވާހަކަފުޅު ދައްކަވަމުންނެވެ. ޢަލީ އާޒިމް ވިދާޅުވީ، ނިމެމުން މިދާ ރައްޔިތުންގެ މަޖިލީހުގެ މެމްބަރުންގެ ތެރެއިން 90 އިންސައްތަ މެމްބަރު އައު މަޖިލީހުގައި ނުހިމެނޭނެ ކަމަށާއި، އެހެން ކަމުން ނިމެމުން މިދާ 19 ވަނަ ރައްޔިތުންގެ މަޖިލީހުން ދެން އިތުރު ނިންމުންތައް ނުނިންމައި މަޑުޖައްސާލަން ޖެހޭ ކަމަށް ދެކެވަޑައިގަންނަވާ ކަމަށެވެ.

ނިމެމުން މިދާ ރައްޔިތުންގެ މަޖިލީހުގައި އެމްޑީޕީއަށް އަދިވެސް ސާފު މެޖޯރިޓީ އޮތް ނަމަވެސް، ކުރިޔަށް އޮތް 20 ވަނަ ރައްޔިތުންގެ މަޖިލީހުގެ ސުޕަރ މެޖޯރިޓީ ހޯދާފައި ވަނީ މިހާރު ވެރިކަމުގައި އޮތް ޕީއެންސީންނެވެ.

Advertisement

މެމްބަރު ޢަލީ އާޒިމް ދެއްކެވި ވާހަކަފުޅާއި ގުޅިގެން މަޖިލީހުގެ ރިޔާސަތުގައި އިންނެވި މުޙައްމަދު އަސްލަމް ވިދާޅުވީ، އެފަދަ ހުށައެޅުމެއް މިހާތަނަށް އެއްވެސް މެމްބަރެއްގެ ފަރާތުން ލިބިވަޑައިގެންފައި ނުވާކަމަށެވެ. އޭގެ އިތުރުން މަޖިލީހުން ކަންކަން ނިންމައި ފާސްކުރުމަށް މިހާލަތުގައިވެސް ހުރަހެއް ނެތްކަން ފާހަގަކުރައްވައި އަސްލަމް ވިދާޅުވީ، މަޖިލީހުގެ ޤަވާއިދަށް ބަދަލު ނުގެންނަހައި ހިނދަކު މަޖިލިސް ކުރިޔަށް ގެންދަން ޖެހޭ ކަމަށެވެ.

މިއަދުގެ ޖަލްސާގައި ރައްޔިތުންގެ މަޖިލީހުގެ ރައީސް އަސްލަމް ވިދާޅުވީ، 19 ވަނަ ރައްޔިތުންގެ މަޖިލީހުގެ ޖަލްސާތައް މިއަންނަ މެއި މަހުގެ 13 ވަނަ ދުވަހާއި ހަމައަށް ކުރިޔަށް ދާނެ ކަމަށެވެ.