20 ވަނަ ރައްޔިތުންގެ މަޖިލީހަށް އިންތިޚާބުގެ ވަޑައިގެންނެވި މެމްބަރުން ހުވާކުރުން އޮންނާނީ، އަންނަ މެއި މަހުގެ 28 ވަނަ ދުވަހުގައި ކަމުގައި ރައްޔިތުންގެ މަޖިލީހުން ހާމަކުރައްވައިފިއެވެ.

މިއަދު ކުރިޔަށްދާ ރައްޔިތުންގެ މަޖިލީހުގެ މިދައުރުގެ 21 ވަނަ ޖަލްސާގައި، މަޖިލީހުގެ އެޖެންޑާ އިއުލާނު ކުރެއްވުމަށްފަހުގައި، ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވީ، މަޖިލީހުގެ އައު ދައުރަށް މެމްބަރުން ހުވާކުރެއްވުން އޮންނާނީ މެއި 28 ވަނަ ދުވަހުގައި ކަމަށެވެ. އެދުވަހަކީ މިހާރު އޮތް ރައްޔިތުންގެ މަޖިލީހުގެ ދައުރު ހަމަވެ އުވިގެންދާ ދުވަހެވެ.

ރައްޔިތުންގެ މަޖިިލީހުގެ މިއަދުގެ ޖަލްސާގައި މަޖިލީހުގެ ރައީސް ވަނީ އަލަށް އިންތިޚާބުވި މެމްބަރުންނާއި ގޮނޑި ދިފާޢުކުރެއްވި މެމްބަރުންނަށް މަރުޙަބާ ވިދާޅުވެފައެވެ.

Advertisement

އާދިއްތަ ދުވަހު ބޭއްވި ރައްޔިތުންގެ މަޖިލީހުގެ އިންތިޚާބުގައި ސަރުކާރު ހިންގާ ޕާޓީ ޕީއެންސީން ވަނީ ބޮޑު ކާމިޔާބެއް ހޯދާފައެވެ. އެޕާޓީން މަޖިލީހުގެ ސުޕަރ މެޖޯރިޓީ ހޯދާފައިވާ ކަމަށް ބެލެވޭއިރު، މަޖިލީހުގެ ސާފު އަޤުލަބިއްޔަތު ޕީއެންސީން ވަނީ ކަށަވަރުކޮށްފައެވެ. އަދި މަޖިލީހަށް އަމިއްލަ ގޮތުން ވާދަކޮށް އިންތިޚާބުވި ކެންޑިޑޭޓުންގެ ތެރޭގައި ސަރުކާރުން ތާއީދު ދިން މެމްބަރުން ހިމެނޭއިރު، އަމިއްލަ ފަރާތްތަކުން ކާމިޔާބު ކުރި ގޮނޑިތައް ހިމެނުމުން ޤާނޫނު އަސާސީ އިސްލާޙުކުރުމަށް ބޭނުންވާ 69 ވޯޓާއި އެކު ސަރުކާރަށް މަޖިލީހުގެ ސުޕަރ މެޖޯރިޓީ ކަށަވަރުވެއެވެ.