ޓައިވާނަށް މިރޭވެސް ގާތް ގާތުގައި ބާރުގަދަ ދެ ބިންހެލުން އަތުވެއްޖެއެވެ.

ޔޫއެސް ޖިއޮލޮޖިކަލް ސަރވޭއިން ހާމަކޮށްފައިވާ ގޮތުގައި، އޭޕްރީލްގެ 3 ވަނަ ދުވަހު، ރިކްޓަރ މިންގަނޑުން 7.2 ގެ ބާރު މިނުގައި، ހުއަލިއެން ސިޓީއަށް އައި ބިންހެލުމަށްފަހު ލޮޅުންތައް އަރަމުން ދާއިރު، މިރޭ ވަނީ، ރިކްޓަރ މިންގަނޑުން 6.1 އަދި 6.0 ގެ ބާރު މިނުގައި ދެ ބިންހެލުން އައިސްފައެވެ.

މީގެ އިތުރުން އޭޕްރީލް 3 ވަނަ ދުވަހުގެ ފަހުން މިހާތަނަށް އެ ސަރަހައްދަށް 82 ލޮޅުން އަރާފައިވާ ކަމަށާއި، އަދިވެސް ބިންހެލުމާއި ގުޅިގެން އަރަމުން އަންނަ ލޮޅުންތައް ނުހުއްޓޭ ކަމުގައިވެސް ޔޫއެސް ޖިއޮލޮޖިކަލް ސަރވޭއިން ބުނެފައިވެއެވެ.

އޭޕްރީލް 3 ވަނަ ދުވަހު އައި ބާރުގަދަ ބިންހެލުމުގައި މަދުވެގެން 14 މީހަކު މަރުވި އިރު، މިރޭ އައި ބިންހެލުންތަކުގައި، އެއްވެސް މީހެއްގެ ފުރާނައަށް ގެއްލުމެއް ލިބުނު ކަމުގެ ރިޕޯޓެއް ނެތެވެ.

ފަހުގެ ތާރީޚުގައި އެންމެ ބާރުގަދަ ބިންހެލުމެއް އައީ 1999 ވަނަ އަހަރުގައެވެ. އެފަހަރު 7.3 ގެ ބާރުމިނުގައި އައި ބިންހެލުމުގައި 2000 ވުރެ ގިނަ މީހުން މަރުވިއެވެ.