އިނގިރޭސި އެފްއޭ ކަޕްގެ ފައިނަލަށް މެންޗެސްޓަރ ސިޓީ އާއި މެންޗެސްޓަރ ޔުނައިޓެޑު ދަތުރުކޮށްފިއެވެ. 

މިދިޔަ ސީޒަނުގެ ފައިނަލުގައިވެސް ފެނިގެން ދިޔައީ މި ދެ ޓީމުގެ ކުރިމަތި ލުމެކެވެ. އެ މެޗު 2-1 އިން ކާމިޔާބުކޮށްފައިވަނީ ސިޓީއެވެ.

ފުރަތަމަ ސެމީ ފައިނަލް މެޗުގައި ޗެލްސީގެ މައްޗަށް ސިޓީއިން ކުރި ހޯދާފައިވަނީ 1-0 އިންނެވެ. ސިޓީ މި މެޗުން މޮޅުކޮށްދިން ގޯލު މެޗު ނިމެން 6 މިނެޓަށް ވެފައި ވަނިކޮށް ކާމިޔާބުކޮށްދިނީ ބަނާޑޯ ސިލްވާއެވެ. 

ދެވަނަ ސެމީ ފައިނަލުގައި ބައްދަލުކުރީ މެންޗެސްޓަރ ޔުނައިޓެޑާއި، އިނގިރޭސި ޗެމްޕިއަންޝިޕް (ދެވަނަ ޑިވިޝަން) ގައި އޮތް ކޮވެންޓްރީ ސިޓީއެވެ. ޔުނައިޓެޑުން ފަސޭހަ ކަމާއިއެކު މި މެޗު ކާމިޔާބު ކުރުމުގެ މަގުމަތީގައި އޮއްވައި، ކޮވެންޓްރީއިން ޔުނައިޓެޑު ހާސްކޮށްލީ މެޗުގެ ފަހު 20 މިނެޓުގެ ތެރޭގައެވެ.

ޔުނައިޓެޑުން ވަނީ ފުރަތަމަ ހާފުގައި، ސްކޮޓް މެކްޓޮމިނޭ އަދި ހެރީ މެގުއޭ ޖެހި ގޯލުތަކުން ރަގަޅު ލީޑެއް ނަގާފައެވެ. އަދި ފަހު ހާފުގެ 58 ވަނަ މިނެޓުގައި ބްރޫނޯ ފެނާންޑޭޒް އިތުރު ގޯލެއް ޖަހާ ޔުނައިޓެޑުގެ ލީޑު ފުޅާކުރިއެވެ. 

ނަމަވެސް ކޮވެންޓްރީއިން ފަހަތުން އަރާ މެޗުގެ ނަތީޖާ ހަމަހަމަ ކުރިއެވެ. އެއީ 71 ވަނަ މިނެޓާއި، 79 ވަނަ މިނެޓުގައި ޖެހި ގޯލުތަކުންނާއި، މެޗުގެ އިތުރު ވަގުތުގައި ލިބުނު ޕެނަލްޓީއަކުންނެވެ. 

ޔުނައިޓެޑުން މެޗު ކާމިޔާބު ކުރީ ޕެނަލްޓީ ޝޫޓް އައުޓުން، 4-2 އިންނެވެ.

މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ 25 މެއި ގައެވެ.