މި މޫސުމުގައި އުދަ ބޮޑުވެ ހައިވޭއަށާއި ބުރިޖު ލައިޓްކައިރިއަށް އުދަ އަރައި އެސަރަހައްދަށް ގަލާއި ވެލި އެޅެމުންދާތީ އެކަމަށް ސަމާލުކަން ދިނުމަށް ފުލުހުންގެ ޚިދުމަތު އިޢުލާނުކޮށްފިއެވެ. 

ފުލުހުން މިކަމަށް އިލްތިމާސްކޮށްފައި ވަނީ، ރާއްޖެއަށް މޫސުމީ އުދައިގެ އަސަރުކޮށް ރެޔާ މިއަދު މާލެއަށް އުދައަރާފައި ވަނިކޮށެވެ. އުދަ އެރުމުގެ ސަބަބުން، ހައިވޭ އާއި ސިނަމާލެ ބުރިޖު ގުޅޭ ހިސާބުން، ހުޅުލޭކަންމަތިން ބުރިޖާއި ހައިވޭއަށް ވަނީ ލޮނުއަރައި ގަލާއި ވެލި އެޅިފައެވެ. އަދި މާލޭ ކޮޅުން ސިނަމާލެ ބުރިޖާއި، ބޮޑުތަކުރުފާނު މަގު ގުޅޭ ސަރަހައްދުގައި ޓްރެފިކް ލައިޓްކައިރިން އުދަ އަރައި އެސަރަހައްދަށްވެސް ވަނީ އަކިރިއާ ވެލި އެޅިފައެވެ.

މީގެ އިތުރުން، ލޮނުޒިޔާރަތްކޮޅުން ބްރިޖް ޕްލެޓްފޯމް ކައިރިން އުދައަަރައި، ބޮޑު ތަކުރުފާނު މަގަށްވެސް ގަލާއި ވެލި ވަނީ އެޅިފައެވެ.

ފުލުހުން ވަނީ އެސަރަހައްދުތަކުން ދަތުރުކުރުމުގައި އެއްގަމު އުޅަނދުފަހަރު ދުއްވާ ފަރާތްތަކުން ސަމާލުވުމަށް އިލްތިމާސްކޮށްފައެވެ. އެގޮތަށް ވެއްޔާއި ގައު މަގަށް އެޅިފައި އޮއްވައި ބާރަށް ސައިކަލު ދުއްވާނަކަށް ކަހާލައިގެން ވެއްޓުމުގެ ހާދިސާތައް ހިނގައި އަނިޔާވުމުގެ ފުރުޞަތު ބޮޑުވާނެއެވެ.