ވާރޭ ވެއްސުމަށް ވިލާ އުފައްދަމުން އައި ޔޫއޭއީގެ ދުބާއީއަށް ބޯކޮށް ވާރޭ ވެހި ބޮޑެތި ގެއްލުންތަކާއި ކުރިމަތިލާންޖެހިއްޖެއެވެ.

ޑުބާއީއަށް އިއްޔެއިން ފެށިގެން ވެހުނު ބޯވާރޭގެ ސަބަބުން މުޅި ދުބާއީގައި ވަނީ ފެންބޮޑުވެފައެވެ. ރަންވޭ އާއި ޓެކްސީވޭތަކުގައި ފެންބޮޑުވުމުގެ ސަބަބުން ދުބާއީ އިންޓަނޭޝަނަލް އެއާޕޯޓަށް ފްލައިޓްތައް ނުޖެއްސި ޑައިވާޓް ކުރަން ޖެހުނު ކަމުގައިވެސް މައުލޫމާތު ލިބެއެވެ. ޚަބަރުތައް ބުނާ ގޮތުގައި، އެއާޕޯޓުގެ ރަންވޭގައި ބައިފޫޓަށް ފެން ބޮޑުވިއިރު، އެ އެއާޕޯޓަށް ޖައްސަން އޮތް ފްލައިޓްތައް އެހެން އެއާޕޯޓްތަކަށް ޑައިވާޓްކޮށް، ޝެޑިއުލް ފްލައިޓްތަކުގެ %50 ކެންސަލް ކުރަން ޖެހުނެވެ. އަދި މުޅި އެއާޕޯޓުގެ އޮޕަރޭޝަންތައް ބައިގަޑިއެއްހައި އިރަށް މުޅިން ހުއްޓާލަން ޖެހުނެވެ.

ބޯކޮށް ވާރޭވެހުމުގެ ސަބަބުން ޓަރމިނަލްތަކުގައި ފެންބޮޑުވެ ޝޮޕިންގ ސެންޓަރުތަކާއި އަންޑަރގްރައުންޑް ޕާކިންތައް ފެނުގެ އަޑިޔަށް ދިޔައެވެ. އަދި މެޓްރޯ އެއްގަމު ދަތުރުތުރަށް ބުރޫއަރައި، ބިންގަނޑު ކަނޑައިގެން ދިޔުމާއި ބައެއް ސަރަހައްދުތަކުގެ މަގުތައް ވަނީ ހަލާކުވެފައެވެ. 

ދުބާއީގެ މޫސުމާއި ބެހޭ އިދާާރާއިން ހާމަކޮށްފައިވާ ގޮތުގައި، މުޅި އަހަރު ދުވަހު ދުބާއީއަށް ނުވެހޭހައި ގިނަ ވާރޭ އަންގާރަ ދުވަހު އެކަނި ވަނީ ވެހިފައެވެ. މިގޮތުން އާއްމުގޮތެއްގައި އަހަރެއްގެ ތެރޭގައި، ވެހެނީ 128 މިލިލީޓަރުގެ ވާރޭ ނަމަވެސް އަންގާރަ ދުވަހު ދުބާއީއަށް ވަނީ 160 މިލިލީޓަރުގެ ވާރޭ ވެހިފައެވެ

ބޯކޮށްވާރޭ ވެހުމާއި ފެން ބޮޑުވުމުގެ ސަބަބުން ދުބާއީން މީހަކު މަރުވި ކަމުގެ ރިޕޯޓެއް މިހާތަނަކަށް ނެތެވެ. އެހެން މެދުއިރުމައްޗަށް ކުރަމުން އަންނަ އާދަޔާއި ޚިލާފު މިވިއްސާރައިގައި އޮމާނުގައި ފެންބޮޑުވުމުގެ ސަބަބުން މިހާތަނަށް 18އަށްވުރެ ގިނަ މީހުން ވަނީ މަރުވެފައެވެ.

ދުބާއީގެ މޫސުމާއި ބެހޭ އިދާރާއިން ހާމަކޮށްފައިވާ ގޮތުގައި ވިއްސާރަ ބުދަ ދުވަހަށް ދެމިގެންދާނެއެވެ. ބައެއް ފަރާތްތަކުން ތުހުމަތު ކުރާ ގޮތުގައި މޫސުމީ މިބަދަލަކީ، ވާރޭ ވެހުންމަދު ޔޫއޭއީއަށް ވާރޭ ވެއްސުމަށްޓަކައި އެގައުމުން ކުރިޔަށް ގެންދިޔަ ވިލާގަނޑުތައް އުފެއްދުމުގެ މަސައްކަތުގެ ނުބައި ނަތީޖާއެވެ.