މަރޮށީގެ ބަނދަރުގެ މަސައްކަތް ނިމިގެން ދާއިރު އެބަނދަރު ވެގެންދާނީ އުތުރުގެ އެންމެ ފުރިހަމަ އަދި ފަސޭހަ އެއް ބަނދަރަށް ކަމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ށ އަތޮޅަށް ކުރައްވަމުން ގެންދަވާ ކެމްޕޭން ދަތުރުފުޅުގެ ތެރެއިން މިއަދު މެންދުރު ށ. މަރޮއްޓަށް ވަޑައިގެން އެރަށުގެ ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، މަރޮއްޓަކީ އާބާދީ ކުޑަ ރަށަަކަށް ވާތީ އެރަށް އޮތީ ކުރީ ސަރުކާރުތަކުގައި އެކަހެރިކޮށް ބާކީކޮށްފައި ކަމަށެވެ. އެހެން ނަމަވެސް މިސަރުކާރުން ވަނީ އަލުން ސިޔާސަތުތަކަށް ބަދަލު ގެނެސް، ތަރައްޤީގެ މަޝްރޫޢުތައް ހިންގަން ފަށާފައި ކަމުގައި ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، މިސަރުކާރުން އެންމެ ފުރަތަމަ ފެނާއި ނަރުދަމާ ޤާއިމްކުރުމުގެ މަސައްކަތް ފެށި އެއް ރަށަކީ މަރޮށި ކަމަށާއި އެމަޝްރޫޢު އަވަހަށް އަދި މުޅިިން ނިންމާލުމަށް ޚާއްޞަ އިސްކަމެއް ދެއްވާކަމަށެވެ. މީގެ އިތުރުން މަރޮށީގެ ބަނދަރު ހެދުމުގެ މަސައްކަތަށް އިޝާރާތްކުރައްވައި ރައީސުލްޖުމްހޫރިއްޔާ ވިދާޅުވީ، ބަނދަރު ނިމިގެން ދާއިރު އުތުރުގައި އޮތް އެންމެ ފުރިހަމަ އެންމެ ފަސޭހަ ބަނދަރަށް، މަރޮށީގެ ބަނދަރު ވެގެންދާނެ ކަމަށެވެ. 

މީގެ އިތުރުން ދެވަނަ ދައުރަކަށް އިންތިޚާބުކޮށްދެއްވައިފިނަމަ، މަރޮށީގެ ބިންހިއްކައި ގޯތި ދެއްވުމުގެ މަޝްރޫޢު ކުރިޔަށް ގެންގޮސްދެއްވާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.