ހޯމް މިނިސްޓަރ ޢަލީ އިޙްސާނާއި، ފުލުހުންގެ އިސް އޮފިސަރުންތަކެއް ކޯޓު ހުރުމަތް ކެނޑިކަމަށް ބަލައި ފިޔަވަޅު އަޅަން އުޅޭ ކަމުގެ ޚަބަރުތަކެއް އިވިވަޑައިގެންނެވީ މީޑިއާއިން ކަމުގައި ހޯމް މިނިސްޓަރ ޢަލީ އިހްސާން ވިދާޅުވެއްޖެއެވެ.

ނޫންޑޮޓްއެމްވީ އާ ވާހަކަފުޅު ދައްކަވަމުން މިނިސްޓަރ އިހްސާން ވިދާޅުވީ އެފަދަ މައްސަލައެއް ބަލާކަން ކޯޓުން މިހާތަނަށް އަންގާފައި ނުވާކަމަށެވެ. މީގެ އިތުރުން އެމަނިކުފާނު ވިދާޅުވީ، އެޚަބަރުތައް ފެނިވަޑައިގެންނެވީ މީޑިއާއިން ކަމަށާއި އެހެން ކަމުން އެކަމާއި ގުޅޭ ގޮތުން އިތުރު މައުލޫމާތެއް ނެތްކަމަށެވެ.

ހޯމް މިނިސްޓަރ ޢަލީ އިޙްސާން ވިދާޅުވީ، އެމަނިކުފާނާއި، ފުލުހުންވެސް މީޑިއާ އަށާއި ރައްޔިތުންނަށް ހާމަކޮށްދެއްވާފައި ވަނީ، މައްސަލަތަކުގައި ފުލުހުން އަމަލުކޮށްފައިވާ ގޮތާއި، ކުށްކުރާ މީހުންނަށް ހައްޤު އަދަބު ދިނުމަށް ކުރެވޭ ބުރަ މަސައްކަތްތައް ކަމަށެވެ. އަދި ކޯޓުގެ ޙުކުމްތަކާއި ކޯޓުގެ ނިންމުންތަކަށް ފާޑުކިޔުމަކީ، ސަރުކާރާއި ފުލުހުންގެ މުއައްސަސާއިންވެސް ކުރާނެ ކަމެއް ނޫންކަމަށާއި، އަދި ހަމައެގޮތަށް ބޮޑެތި މައްސަލަތަކުގައި ފުލުހުންގެ ތަޙްޤީޤުތައް ހިނގައިގޮސްފައިވާ ގޮތުގެ ސާފު މައުލޫމާތު ލިބުމަކީ މީޑިއާތަކަށާއި ރައްޔިތުންނަށްވެސް އޮތް ޙައްޤެއް ކަމުގައި ދެކެވަޑައިގަންނަވާ ކަމަށެވެ.

Advertisement

މީޑިއާތަކުގައި ރިޕޯޓްކޮށްފައިވާ ގޮތުގައި، ކްރިމިނަލް ކޯޓުން އެކޯޓުގެ ފަނޑިޔާރުންގެ މަޖިލީހަށް ހުށައަޅައިގެން ބަލަން ނިންމާފައި ވަނީ، 119 ކިލޯގެ މަސްތުވާތަކެތީގެ މައްސަލައިގައި، އޭޕްރީލް މަހުގެ 4 ވަނަ ދުވަހު ފުލުހުން ބޭއްވި ނޫސްކޮންފަރެންސްގައި ހޯމްމިނިސްޓަރާއި ފުލުހުންގެ އިސް އޮފިސަރުން ދެއްކެވި ވާހަކަފުޅުތަކުގައި ކޯޓުގެ ހުރުމަތް ކެނޑިކަމަށް ބަލައިގެން ބަލަން ނިންމާފައިވާ މައްސަލައެކެވެ. އެހެން ނަމަވެސް އެކަމާއި ގުޅޭ ތަފްސީލެއް ކްރިމިނަލްކޯޓުންވެސް ހިއްޞާކޮށްފައެއް ނުވެއެވެ.