ކޮމަންޑުގެ ރައްޔިތުން އެދޭ ފަދައިން ކުރިޔަށް އޮތް ދައުރުގައި، ށ. ކުޑަފަރުގައި އެއާޕޯޓެއް ތަރައްޤީކޮށް ދެއްވާނެ ކަމުގައި އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރިޔާސީ އިންތިޚާބުގެ ކެމްޕޭން ފެށުމުގެ ގޮތުން މިއަދު ށ އަތޮޅަށް ފެއްޓެވި ދަތުރުފުޅުގައި މިއަދު ހެނދުނު، ކޮމަންޑޫ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ. ރައީސުލްޖުމްހޫރިްޔާއާ އެމަނިކުފާނުގެ ޓީމް ކޮމަންޑޫއަށް ވަޑައިގެންނެވުމުން ކޮމަންޑޫގެ ރައްޔިތުންގެ ފަރާތުން ވަނީ ވަރަށް ހޫނު މަރުޚަބާއެއް ދަންނަވާފައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ކޮމަންޑޫއާ ގާތުގައި އޮތް ކުޑަފަރުގައި އެއާޕޯޓެއް ތަރައްޤީވެގެން ދިޔުމަކީ ކޮމަންޑޫގެ ރައްޔިތުން އެކަމަށް އެދި ތިިބިކަމެއް ކަމަށެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، މީހުން ދިރިއުޅޭ ކޮންމެ ރަށަކުންވެސް 20 މިނިޓުން ދެވޭ ސަރަހައްދުގައި އެއާޕޯޓެއް ތަަރައްޤީކުރުމަކީ، މިސަރުކާރުގެ ސިޔާސަތެއް ކަމުގައެވެ. އަދި ރައްޔިތުން މިސަރުކާރަށް ކުރިޔަށް އޮތް ދައުުުރު ދެއްވައިފިނަމަ، ކުޑަފަރުގައި އެއާޕޯޓެއް ތަރައްޤީކޮށްދެއްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

މިހާރު ށ އަތޮޅުގައި އެއާޕޯޓެއް އޮންނަނީ އެއަތޮޅުވެ ވެރިކަން ކުރާރަށް ފުނަދޫގައެވެ.