ރައްޔިތުންގެ މަޖިލީހުގެ އިންތިޚާބާއި ގުޅިގެން، ވަޒީފާގެ ބިރުދެއްކުމާއި ވަޒީފާއިން ވަކިކުރުމާއި، އަދި ވަކި ކެންޑިޑޭޓަކަށް ތާއީދުކުރާ ފަރާތްތަކަށް ވަޒީފާ ދިނުމުގެ ކަންކަން ހިންގަމުންދާތީ އެކަމާއި މެދު ކަންބޮޑުވާ ކަމުގައި އެޗްއާރްސީއެމްއިން ބުނެފިއެވެ.

އެޗްއާރްސީއެމްއިން ނެރުނު ބަޔާނުގައި ބުނެފައި ވަނީ، ވަކި ކެންޑިޑޭޓަކަށް ތާއީދު ހޯދުމުގެ ގޮތުން ވޯޓަށް ނުފޫޒް ފޯރުވުމަށް ވަޒީފާ ދިނުމާއި، އަދި ވަކި ކެންޑިޑޭޓަކަށް ތާއީދު ކުރުމުން ވަޒީފާގެ ބިރު ދެއްކުން ފަދަ އިންތިޚާބަށް ނުފޫޒް ފޯރުވުމުގެ އަމަލުތައް ހިނގަމުންދާ ކަމުގެ މައުލޫމާތު އެކޮމިޝަނަށް ލިބެމުން ދަނީ، މީޑިޔާތަކުންނާއި މީސްމީޑިއާއިން ކަމަށެވެ. އަދި އެކަން ކަން ހަރުކަށި އިބާރާތުން ކުއްވެރިކުރާ ކަމަށާއި، އެކަން ކުރާ ފަރާތްތަކާއި މެދު ފިޔަވަޅު އެޅުމަށް ކަމާއި ގުޅުން ހުރި މުއައްސަސާތަކަށް ގޮވާލާކަމުގައި، އެޗްއާރްސީއެމްގެ ބަޔާނުގައި ބުނެފައިވެއެވެ.

މީގެ އިތުރުން ކެންޑިޑޭޓުންނާ ގުޅޭ ގޮތުންނާއި ސިޔާސީ ޕާޓީތަކާއި ގުޅޭ ގޮތުން ޙަޤީޤަތާއި ޚިލާފު ދޮގު ވާހަކަތައް ގަސްދުގައި ގެއްލުން ދިނުމަށްޓަކައި ނުވަތަ ގަސްދުގައި ގެއްލުން ދިނުމުގެ ނިޔަތެއް ނެތި ނަމަވެސް ފަތުރަމުންދާ ކަމާއި، ރިޝްވަތު ދިނުމާއި ވޯޓު ގަނެވިއްކުމާއި ވަޒީފާގެ ބިރު ދެއްކުމާއި ކެމްޕެއިން ޕޯސްޓަރު ތަކަށް ގެއްލުން ދިނުމާއި، ކެމްޕެއިނަށް ހުރަސް އެޅުންފަދަ ކަންކަން ހިނގަމުންދާ ކަމުގެ މައުލޫމާތުވެސް ލިބެމުން އަންނަ ކަމުގައި އެޗްއާރްސީއެމުން ވަނީ ބުނެފައެވެ. އަދި އެފަދަ ފަރާތްތަކާއި މެދު ފިޔަވަޅު އެޅުމަށާއި، އެފަދަ ކަންކަމުން ދުރުހެލިވުމަށްވެސް އެޗްއާރްސީއެމްއިން ވަނީ ގޮވާލާފައެވެ.