މި ސީޒަނުގައި އެއްވެސް މެޗަކުން ބަލިނުވެ، މިހާތަނަށް ހައިރާންކުރުވަނިވި ރެކޯޑެއް ދަމަހައްޓާފައިވާ ބެޔާން ލެވަކޫސެން އިން، ބާކީ ފަސް މެޗު ކުޅެން އޮއްވައި ޖަރުމަނު  ލީގު ޔަގީންކޮށްފިއެވެ. މިއީ ލެވަކޫސެން އިން އެ ކުލަބުގެ ތާރީހުގައި ލީގު ކާމިޔާބުކުރި ފުރަތަމަ ފަހަރެވެ.

ކުރިން ލިވަޕޫލް އަދި ރެއާލް މެޑްރިޑަށް ކުޅެފައިވާ ސްޕެއިންގެ ތަރި، ޒަބީ އަލޮންސޯގެ އިރުޝާދުގެ ދަށުން ކުޅެމުން އަންނަ ލެވަކޫސެން އާދީއްތަ ދުވަހުގެރޭ ވާޑަރ ބްރެމެންއާ ދެކޮޅަށް ނިކުތްއިރު، ލީގު ޔަގީން ކުރުމަށް އެ ޓީމަށް ބޭނުންވެފައި އޮތީ 3 ޕޮއިންޓެވެ. ނަމަވެސް ލެވަކޫސެން އިން ތަށި ޔަގީންކުރީ ތަފާތު ބޮޑުކޮށް، ވާޑަރ ބްރެމެން 5-0 އިން ބަލިކުރުމަށްފަހުއެވެ. 

ލެވަކޫސެންއާ ވާޑަރ ބްރެމެން ބައްދަލުކުރި މެޗު ނިންމާލުމަށް ރެފްރީ ކަށިގަނޑު ފުމެލުމާއެކީ އުފާފާޅުކުރުމުގެ ގޮތުން އެ ޓީމުގެ ސަޕޯޓަރުން ވަނީ ދަނޑަށް އަރާ، ދަނޑުގެ ފެހިވިނަ ނުފެންނަ ވަރަށް ދަނޑު ފުރާލާފައެވެ. 

Advertisement

މެޗަށްފަހު ލެވަކޫސެންގެ ސަޕޯޓަރުން ދަނޑަށް އަރާފައި

މި މެޗަށްފަހު ލެވަކޫސެންގެ ކޯޗު އަލޯންސޯ ބުނީ، މިއީ އާއިލާއާ، ރަށްޓެހިން އަދި ސަޕޯޓަރުންނާއެކު އުފާ ފާޅުކުރަންވީ ވަގުތު ކަމުގައެވެ. އަދި މިއީ އޭނާގެ ކޯޗިން ކެރިއަރުގައި ޓީމަކާއެކު ފުރަތަމަ ފަހަރަށް ފުލް ސީޒަނެއް ނިންމާލި ފަހަރަށްވެފައި، މި ސީޒަނުގައި މުޅިން އައު ޓީމަކާއެކީ ލީގު ކާމިޔާބު ކުރުމުން ކުރެވޭ އިހުސާސަކީ އާދަޔާ ޚިލާފު އިހުސާސެއް ކަމަށެވެ. 

ލީގު ތަށްޓާއެކީ ލެވަކޫސަންއަށް ބޮޑު އުފަލެއް ލިބިގެން ދިޔައިރު، އެ ޓީމުން އަންނަނީ މި ސީޒަންގައި 3 ތައްޓަށް ވާދަކުރަމުންމުންނެވެ. އެއީ ލީގުގެ އިތުރުން ޖަރުމަން ކަޕާއި ޔޫރޮޕާ ލީގެވެ. ލެވަކޫސެން މިހާރު ޖަރުމަނު ކަޕުގެ ފައިނަލަށް ދަތުރުކޮށްފައިވާއިރު، ޔޫރޮޕާ ލީގުގެ ކުއާޓާ ފައިނަލްގެ ފުރަތަމަ ލެގު ވެސް އެ ޓީމުން ވަނީ ކާމިޔާބުކޮށްފައެވެ.

ވާޑަރ ބްރެމެންއާ ދެކޮޅަށް ކުޅުނު މެޗުގައި ލެވަކޫސެންއިން ވަނީ ފުރަތަމަ ހާފުގައި ލީޑު ނަގާފައެވެ. އެއީ އެ ޓީމަށް ލިބުނު ޕެނަލްޓީއަކުން، 25 ވަނަ މިނެޓުގައި ބޮނިފޭސް ކާމިޔާބުކުރި ގޯލެކެވެ. އެ ޓީމުގެ ދެވަނަ ގޯލު ކާމިޔާބު ކުރީ މިދިޔަ އަހަރުގެ ޖުލައި މަހު އާސެނަލްއިން ބަދަލުވި ގްރާޓިސް ޖަކާއެވެ. އަދި އެއަށްފަހު ހެޓްރިކެއް ހަދާ، ވާޓްސް ވަނީ މެޗުގެ ނަތީޖާ 5-0 އަށް ބަދަލުކޮށްފައެވެ.