ކޮމަންޑޫއާއި މަތިކޮމަންޑޫގެ ބިންހިއްކުމުގެ މަސައްކަތް މިހިނގާ ޖުލައިމަހުގެ ނިޔަލަށް ނިމޭނެ ކަމުގައި އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ށ އަތޮޅަށް ފެއްޓެވި ކެމްޕޭން ދަތުރުފުޅުގައި މިއަދު ކޮމަންޑޫއަށް ވަޑައިގެން ކޮމަންޑޫގެ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.

ރައިސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، ސަރުކާރުން އަލަށް ގެންނަ ޑްރެޖަރު ވަރަށް އަވަހަށް ހއ އިހަވަންދޫއަށް ބަނދަރު ކުރާނެ ކަމަށާއި، އެރަށުގެ ބިންހިއްކުމަށް ހޭދަވާނީ 9 ދުވަސް ކަމަށެވެ. އަދި ޖުލައި މަހުގެ ފަހު ހަފްތާގައި އެ ޑްރެޖަރު އޮންނާނީ ކޮމަންޑޫގައި ކަމަށްވެސް ރައީސް ވިދާުޅުވިއެވެ.

ރައީސް ވިދާޅުވީ، ދެކޮމަންޑޫގެ ބިންހިއްކައި ބްރިޖަކުން ގުޅާލުމަށް ފަހުގައި، މަތިކޮމަންޑޫގައި ސަރުކާރުން 300 ހައުސިންގ ޔުނިޓް އަޅުއްވައި ދެއްވާނެ ކަމަށެވެ. އޭގެ އިތުރުން ކޮމަންޑޫ ސިއްޙީ މަރުކަޒު 30 އެނދުގެ ހޮސްޕިޓަލަަކަށްވެސް އަންނަ ދައުރުގެ ތެރޭގައި ބަދަލު ކުރެވިގެންދާނެ ކަމުގައި އެމަނިކުފާނު ވަނީ ވިދާޅުވެފައެވެ.

ދެކޮމަންޑޫގެ ބިންހިއްކައި ބުރިޖަކުން ގުޅާލުމުގެ މަޝްރޫއަށް ސަރުކާރުގެ ބަޖެޓުން 250 މިލިއަން ރުފިޔާ ޚަރަދު ކުރައްވައެެވެ.