އިރާނުން އިޒްރޭލަށް އަމާޒުކޮށް އެތައް ސަތޭކަ ފިދާއީ ޑްރޯންތައް ފަސް ބުރެއްގެ މަތިން ފޮނުވާލައިފި ކަމަށާއި، ބެލެސްޓިކް މިސައިލްތަކުންވެސް ހަމަލާތައް ފޮނުވާލައިފި ކަމުގައި ރިޕޯޓްތައް ބުނެފިއެވެ.

މީގެ އިތުރުން ޢިރާޤުގެ ތެރެއިން އިޒްރޭލަށް ހަމަލާތައް ދީފައި ވާއިރު، ޔަމަނުންވެސް ބެލެސްޓިކް މިސައިލްތަކާއި ޑްރޯން ހަމަލާތައް ވަނީ ފޮނުވާލާފައެވެ.

އީރާނުގެ ޑްރޯންތައް މަތަކުރުމަށް އިޒްރޭލުގެ ވައިގެ އަސްކަރިއްޔާގެ މަތިންދާ ބޯޓުތައް ސީރިއާގެ ވައިގެ ސަރަހައްދުގެ ތެރެއަށް ވަދެފައިވާ ކަމުގައިވެސް ރިޕޯޓްތައް ބުނެއެވެ.

އިރާޤު މަތިން ޑްރޯންތައް މިހާރު ގޮސްފައި ވާއިރު، އިޒްރޭލުން ހިފާފައިވާ ގޯލާނުގެ އުސް ސަރަހައްދުތަކަށް ހަމަލާތައް ފޯރައިފި ކަމުގައިވެސް ރިޕޯޓްތައް ބުނެއެވެ.

އީރާނުގެ ޚަބަރުތައް ގެނެސްދޭ ޓެލެގްރާމް ޗެނަލްތަކުގައި ބުނެފައިވާ ގޮތުގައި، އީރާނުން މިހާރު ވަނީ، ހަލުވި ސުޕަސޮނިކް މިސައިލް ހަމަލާތަކެއްވެސް އިޒްރޭލާއި ދިމާއަށް ފޮނުވާލާފައެވެ.

އީރާނުން ބުނެފައި ވަނީ އިޒްރޭލަށް ދޭ ހަމަލާތައް އަމާޒްކޮށްފައި ވަނީ ކަނޑައަޅާފައިވާ ވަކިތަންތަނަށް ކަމަށެވެ. އަދި ހަމަލާގެ ތެރެއަށް އެމެރިކާއިން ނުވަނުމަށް އީރާނުން އިންޒާރުކޮށްފައިވެއެވެ. މީގެ އިތުރުން އީރާނުގެ ހަމަލާތަކާއި ދެކޮޅަށް ރައްދުހަމަލާއެއް ދިން ކޮންމެ ފަރާތަކަށް ހަމަލާދޭނެ ކަމުގައިވެސް އީރާނުން ވަނީ ބުނެފައެވެ.

އިޒްރޭލަށް ދޭ ހަމަލާތައް ފެށުމާއި އެކު، އިޒްރާއީލްގެ ދޫމްސްޑޭ މަތިންދާބޯޓުގައި ކޮންމެވެސް ބަޔަކު އިޒްރޭލު ދޫކޮށް ހިނގައްޖެ ކަމަށާއި ބެލެވޭ ގޮތުގައި އެއީ އިޒްރޭލު ސަރުކާރުގެ އިސް އޮފިޝަލުން ތިއްބެވި ބޯޓެއް ކަަމަށްވެސް ބައެއް މަސްދަރުތަކުން ބުނެފައިވެއެވެ.