އެމްޑީޕީގެ ރިޔާސީ ކެމްޕޭން ރަސްމީގޮތުން ފެއްޓެވުމަށްޓަކައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ށ އަތޮޅަށް ކުރައްވާ ރަސްމީ ދަތުރުފުޅެއް މިއަދު ފައްޓަވައިފިއެވެ.

އެމްޑީޕީން ހާމަކޮށްފައިވާ ގޮތުގައި، އެޕާޓީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ރަސްމީ ކެމްޕޭން ފަށާނީ ށ. ފޯކައިދޫއިންނެވެ. މީގެ އިތުރުން އެމަނިކުފާނުގެ މިދަތުރުފުޅުގައި، ށ.އަތޮޅުގެ އެހެން ބައެއް ރަށްރަށަށް ވެސް ވަޑައިގަންނަވާނެއެވެ. މިގޮތުން، ކޮމަންޑޫ، ނޫމަރާ، އަދި މަރޮއްޓަށް އެމަނިކުފާނު ވަޑައިގެން އެރަށްރަށުގައިވެސް ކެމްޕޭން ހަރަކާތްތަކުގައި ބައިވެރިވެވަޑައިގަންނަވާނެއެވެ.

އެމޑީޕީގެ ކެމްޕޭން މިދަތުރުގައި އެމްޑީޕީއާއެކު މިއަހަރުގެ ރިޔާސީ އިންތިޚާބަށް ކޯލިޝަން ހަދާފައިވާ، އަދާލަތުޕާޓީއާ އެމްޑީއޭގެ އިސްވެރިންވެސް ބައިވެރިވެވަޑައިގަންނަވައެވެ. މީގެ އިތުރުން ފޮރިން މިނިސްޓަރ ޢަބުދުﷲ ޝާހިދާއި، ޑިފެންސް މިނިސްޓަރ މާރިޔާ އަޙްމަދު ދީދީވެސް މިދަތުރުފުޅުގައި ބައިވެރިވެވަޑައިގެންފައިވެއެވެ.

ށ. އަތޮޅަކީ، މިސަރުކާރުން ތަރައްޤީގެ ގިނަ މަޝްރޫޢުތަކެއް ހިންގާފައިވާ އަތޮޅެކެވެ. އެ އަތޮޅުގައި މިހާރުވެސް ޢުމުރާނީ ތަރައްޤީގެ ގިނަ މަޝްރޫޢުތަކެއް ދަނީ ހިނގަމުންނެވެ.