އޮސްޓްރޭލިއާގެ ސިޑްނީގައި މީހަކު ވަޅިން ހަމަލާދީ އާއްމުންގެ 6 މީހަކު މަރާލައިފިއެވެ.

ހަމަލާދިން މީހާ ހުއްޓުވުމަށް ކުރި މަސައްކަތުގައި ސިޑްނީގެ ފުލުހުން ވަނީ، އެމީހާގެ ގަޔަށް ބަޑިޖަހައި މަރާލާފައެވެ.

ވަޅީގެ މިހަމަލާގައި 6 މީހުން މަރުވުމުގެ އިތުރުން، އެތައް ބަޔަކު ވަނީ ޒަޚަމްވެފައެވެ. މިހަމަލާދީފައި ވަނީ ސިޑްނީގެ މަގުމަތީގައި، ވެސްޓްފީލްޑް ބޮންޑީ ޖަންކްޝަން ސަރަހައްދުގައެވެ. އެސަރަހައްދުގައި އިޒްރޭލަށް ނިސްބަތްވާ ރެސްޓޯރެންޓެއް ހުންނައިރު އެއީ ޔަހޫދީންވެސް ގިނަ އަދަދަކަށް ދިރިއުޅެމުންދާ ސަރަހައްދެކެވެ.

މީހަކު ވަޅިން ދިން މިހަމަލާގައި 6 މީހަކު މަރާލުމުގެ އިތުރުން 8 މީހަކަށާއި، 9 މަހުގެ ކުޑަ ކުއްޖަކަށްވެސް ހަމަލާދީ ޒަޚަމްކޮށްލާފައިވެއެވެ. އޭގެ ތެރޭގައި އެތުއްތު ކުއްޖާގެ މަންމަވެސް ހިމެނެއެވެ.

ހަމަލާދިން މީހާއަކީ އެކަނި އުޅުނު މީހެއް ކަމަށާއި، އޭނާއެކު އެ ހަމަލާދިނުމުގައި އެހެން ބަޔަކު ބައިވެރިވެފައިވާ ކަން މިހާތަނަށް ފާހަގަވެފައި ނެތްކަމަށާއި، އަދި ހަމަލާދިން މީހާ ދެނެގަތުމުގެ މަސައްކަތް ކުރަމުންދާކަމުގައި، ނިއު ސައުތު ވޭލްސްގެ ޕޮލިސް އެސިސްޓެންޓް ކޮމިޝަނަރު އެންތަނީ ކުކް ވަނީ ވިދާޅުވެފައެވެ. 

ސިޑްނީގައި ދިން މިހަމަލާ އާއި ގުޅިގެން ސަލާމަތީ ފިޔަވަޅުތައް ވަނީ ވަރުގަދަކޮށްފައެވެ.