އެމެރިކާ އާއި ރަޝިޔާގެ މެދުގައި ހަނގުރާމައެއް ފެށިއްޖެނަމަ، ރަޝިޔާއިން އުދުއްސާލާތާ 15 މިނިޓްގެ ތެރޭގައި އެމެރިކާއަށް ފޯރާނެ، އިންޓަރކޮންޓިނެންޓަލް ބެލެސްޓިކް މިސައިލެއް ރަޝިޔާއިން ޓެސްޓްކޮށްފިއެވެ. 

ރަޝިޔާގެ ދިފާއީވުޒާރާއިން ބުނެފައި ވަނީ އެޤައުމުގެ ދެކުނުގެ އަސްޓްރާޚާން ސަރަޙައްދުގެ ކަޕޫސްޓިންޔާރް ރޮކެޓް ލޯންޗް ކޮމްޕްލެކްސްގައި އިންޓަރކޮންޓިނެންޓަލް ބެލިސްޓިކް މިސައިލެއް ހުކުރު ދުވަހު ކާމިޔާބުކަމާއެކު ޓެސްޓްކޮށްފައިވާ ކަމަށެވެ.

ރަޝިޔާ އާއި އެމެރިކާގެ އަސްކަރީ ވާދަ ވެރިކަމުގައި ދެޤައުމުންވެސް ދަނީ، ޒަމާނީ ހަތިޔާރު އުފެއްދުމުގެ ވާދައިގައި މަސައްކަތް ކުރަމުންނެވެ. އަދި ހުކުރު ދުވަހު ރަަޝިޔާއިން ޓެސްޓްކުރި އިންޓަރކޮންޓިނެންޓަލް ބެލަސްޓިކް މިސައިލަކީ، 27000 ކިލޯމީޓަރު ދުރުގައިވާ އަމާޒުތަކަށްވެސް ކާމިޔާބު ކަމާއި އެކު ހަމަލާ ދެވޭނެ މިސައިލެއްކަމުގައި ރަޝިޔާއިން ވަނީ ހާމަކޮށްފައެވެ.

ރަޝިޔާއަށް ހަތިޔާރު އުފެއްދުމަށް ބޭނުންވާ ސާމަނު ވިއްކަމުން ދަނީ ޗައިނާއިން ކަމަށް ބުނެ، އެވިޔަފާރީގެ މުއާމާލާތްތަކާއި ދެކޮޅަށް އެމެރިކާއިން އަންނަނީ މަސައްކަތްކުރަމުންނެވެ.