މަތި ކޮމަންޑޫ ބިންހިއްކުމުގެ މަސައްކަތް ނިންމައި، ދެކޮމަންޑޫ ގުޅާލާ ބުރިޖުގެ މަސައްކަތް އަންނަ މަހު ފަށާނެ ކަމުގައި އެމްޓީސީސީން ބުނެފިއެވެ.

ކޮމަންޑޫއަށް ދިމާވެފައިވާ ބިމުގެ ދަތިކަމަށް ހައްލެއް ހޯދުމުގެ ގޮތުން މަތި ކޮމަންޑޫގެ ބިން ހިއްކައި، ދެކޮމަންޑޫ ބުރިޖަކުން ގުޅާލުމަށް ސަރުކާރުން ވަނީ ނިންމާފައެވެ. އެމައްސަކަތުގެ ދަށުން ކޮމަންޑޫގެ ބިންހިއްކުމުގެ މަސައްކަތް ވަނީ ކޮށްފައެވެ. އަދި މަތި ކޮމަންޑޫ ބިން ހިއްކުމުގެ މަސައްކަތް އޮގަސްޓް މަހުގެ ތެރޭގައި ނިމޭނެ ކަމުގައި އެމްޓީސީސީން ވަނީ ބުނެފައެވެ. މަތިކޮމަންޑޫއިން ހިއްކުމަށް ކަނޑައަޅާފައި ވަނީ 16.7 ހެކްޓަރުގެ ބިމެވެ. އަދި ދެކޮމަންޑޫ ގުޅާލުމުގެ ގޮތުން 200 މީޓަރުގެ ބުރިޖެއް އަޅާނެއެވެ، މިމަޝްރޫޢަކީ ދައުލަތުގެ ބަޖެޓުން 240 މިލިއަނަށްވުރެ ގިނަ ރުފިޔާ ޚަރަދު ކުރައްވައިގެން ކުރިޔަށް ގެންދަވާ މަޝްރޫޢެކެވެ.

މަތި ކޮމަންޑޫ އާއި ކޮމަންޑޫ ހިއްކައި ގުޅާލުމުގެ މަސައްކަތް ހިނގަމުންދާ ގޮތް ބައްލަވާލެއްވުމަށް އެމްޓީސީސީގެ ސީއީއޯ އާދަމް އާޒިމް ވަނީ، ހުކުރު ދުވަހު، ކޮމަންޑޫއަށް ޒިޔާރަތްކުރައްވައި، މަސައްކަތް ހިނގަމުންދާ ސަރަހައްދު ބައްލަވާލައްވައި، ކޮމަންޑޫ ކައުންސިލާއި ބައްދަލު ކުރައްވާފައެވެ.

ދެ ކޮމަންޑޫގެ ބިން ހިއްކުމާއި ދެކޮމަންޑޫ ގުޅާލުމުގެ މަސައްކަތަކީ، ކޮމަންޑޫގެ ރައްޔިތުންގެ ވަރަށް ބޮޑު އުއްމީދެކެވެ.