ކޯވިޑް-19 އާއި ގުޅިގެން އެސްޑިއެފްސީން ދޫކޮށްފައިވާ ލޯންތަކުގެ އިންޓަރެސްޓް ފައިސާ ރައީސް ސާލިޙްގެ ސަރުކާރުން މަޢާފްކޮށްދެއްވާފައި ވަނިކޮށް، މިސަރުކާރުންކޮށްދޭނެ ކަމެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ.

ރައީސް އިބްރާހީމް މުޙައްމަދު ޞާލިޙްގެ ސަރުކާރުގައި، އެލޯނުތަކުގެ އިންޓަރެސްޓް މަޢާފްކުރައްވައި، އަދި އިންޓަރެސްޓްގެ ގޮތުގައި ފައިސާ ދެއްކި ފަރާތްތަކުން ދައްކާފައިވާ ފައިސާ އަނބުރާ އެފަރާތްތަކަށް ދިނުމަށާއި ލޯނުގެ މުއްދަތަށް 10 އަހަރު އިތުރުކުރެއްވުމަށް ނިންމަވައި، އެކަން ރައީސުލްޖުމްހޫރިއްޔާގެ އޮފީހުން މިނިސްޓްރީ އޮފް ފިނޭންސަށް އަންގަވާފައި ވަނީ، 15 ނޮވެމްބަރު 2023 ގައެވެ. އޭގެ ކުރިން، އެކަން އެގޮތަށް ސަރުކާރުން ހަމަޖައްސަވާނެކަން ރައީސް ޞާލިޙް އިއުލާނު ކުރެއްވީ، 22 ސެޕްޓެމްބަރު 2023ގައެވެ.

އެހެން ކަމުން ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒުވެރިކަމާއި ހަވާލުވެވަޑައިގެންނެވި އިރު، އެކަމާއި ގުޅިގެން ދައުލަތުން ނިންމަންޖެހޭ ކަންކަމުގެ ޒިންމާ އޮތީ ދައުލަތަށެވެ. ސަރުކާރުން ނިންމާފައިވާ އެނިންމުން ތަންފީޒްނުކުރައްވައި، މިހާތަނަށް މަޑުޖެހިފައި އޮތީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސަރުކާރާއި ހަވާލުވުމަށްފަހު ދައުލަތުގެ ފަރާތުން ކުރަންޖެހޭ ކަންކަން މިފާއިތުވި 4 މަސްދުވަހުގެ ތެރޭގައި ނިމިފައި ނެތުމުގެ ސަބަބުންނެވެ.

މީގެ އިތުރުން އެޗްޑީއެފްސީން ނަގާފައިވާ ލޯނުތަކަށް ރައީސް ޞާލިޙްގެ ސަރުކާރުގައި ކޯވިޑާއި ގުޅިގެން ލުއިތައް ދީފައިވާއިރު، "ގެދޮރުވެރިޔާ" ސްކީމް ތަޢާރަފްކުރި އިރު ހައުސިންގ ލޯނުތަކުގެ އިންޓަރެސްޓް %6އަށް ކުޑަކުރީވެސް ރައީސުލްޖުމްހޫރިއްޔާ އިބްރާހީމް މުހަމަދު ޞާލިޙްގެ ވެރިކަމުގައެވެ.

ފޮނަދޫގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވީ، ކޮވިޑުގެ ތެރޭގައި އެސް.ޑީ.އެފް.ސީ. އަދި އެޗް.ޑީ.އެފް.ސީ. މެދުވެރިކޮށް އެކި ފަރާތްތަކުން ނަގާފައިވާ ލޯނުތަކަށް އަރާފައިވާ އިންޓްރެސްޓް މާފުކޮށްދޭން ނިންމަވާފައިވާކަމަށެވެ. 

ރައްޔިތުންގެ މަޖިލީހުގެ އިންތިޚާބަށް 8 ދުވަހަށް ވެފައި ވަނިކޮށް، ރައީސް ޑރ. މުޙައްމަދު މުޢިއްޒު ވިދާޅުވީ އެމަނިކުފާނުގެ ސަރުކާރުން އިންތިޚާބެއް އައިސް ބޯމަތިވާންދެން ކަމެއް ނުކޮށް ނުބާއްވާ ކަމަށެވެ. އަދި ފުރަތަމަ ދުވަހުން ފެށިގެން ހުރިހާ ކަމެއް ފަށައި މިއަދާއި ހަމައަށް އައިރު މިވީ 4 މަސް ކަމުގައިވެސް އެމަނިކުފާނު ވިދާޅުވިއެވެ.

އެސްޑީއެފްސީގެ ލޯނުތަކުގެ އިންޓަރެސްޓަކީ ކުރީ ސަރުކާރުގައި މަޢާފްކޮށްދީ، ސަރުކާރު ބަދަލުވި އިރު އެކަން ތަންފީޒު ކުރުމުގެ މަރުހަލާގައި އޮތް ކަމަކަށް ވާއިރު، ދެވަނަ ކަމަކަށް ރައީސް ޑރ. މުޢިއްޒު ވިދާޅުވި އެޗްޑީއެފްސީގެ ލޯނުތަކުގެ އިންޓަރެސްޓް މަޢާފްކުރުމަކީ، ސަރުކާރަށް ނިންމެން އޮތް ނިންމުމެއް ނޫނެވެ.

މީގެ ކުރިން ހުޅުމާލޭގެ ފޭސް 1އިން ދޫކޮށްފައިވާ ފްލެޓްތަކުގެ ކުޑަކުރެއްވި ކަމުގައި އެމަނިކުފާނު އިޢުލާނު ކުރެއްވި ނަމަވެސް، އެޗްޑީއެފްސީއަށް ފައިސާ ދައްކާގޮތަށް ދޫކޮށްފައިވާ ފްލެޓްތަކުގެ ކުލި ކުޑަކުރިކަމަކަށް އެޗްޑީއެފްސީއަށް ފައިސާ ދައްކަންޖެހޭ ފަރާތްތަކަށް އެކުންފުނިން އަންގާފައެއް ނުވެއެވެ. އަދި އެކަމާއި ގުޅޭ ގޮތުން އެކުންފުނިން ބުނެފައިވަނީ، ހުޅުމާލެ ފޭސް 1 ގައި ހުރި ފްލެޓްތަކުގެ ކުލިކުޑަކުރެއްވި ކަމަށް ރައީސް އިއުލާނު ކުރެއްވި ނަމަވެސް އެކުންފުންޏަށް ފައިސާ ދައްކަންޖެހޭ ފްލެޓްތަކުގެ ކުލި ކުޑަކުރުމާއި ގުޅޭ ގޮތުން ސަރުކާރާއި އެކު ނިންމުމެއް ނިންމިފައި ނުވާ ކަމަށެވެ.