ރައްޔިތުންގެ މަޖިލީހުގެ އިންތިޚާބުގެ ޕްރައިމަރީީގައި ޕީޕީއެމް ޕީއެންސީގެ ތިމަރަފުށީ ދާއިރާގެ ޓިކެޓް ކާމިޔާބު ކުރި، އިބްރާހިމް ސަނާޙް (ސަންޓޯ)ގެ ސަޕޯޓަރުން އެކަމާއި ދެކޮޅު ހަދައި މުޒާހަރާކޮށްފިއެވެ.

ރައްޔިތުންގެ މަޖިލިސް އިންތިޚާބުގައި ތިމަރަފުށީ ދާއިރާއަށް އަމިއްލަ ގޮތުން ވާދަކުރައްވާ އަޙްމަދު ރިޔާޒަށް، ރައީސް ޑރ. މުޙައްމަދު މުޢިއްޒު ތާއީދު ކުރައްވައި އަދި ޕީއެންސީގެ އިސްބޭފުޅުންވެސް ރިޔާޒަށް ކެމްޕޭން ކޮށްދެމުންދާތީ އެކަމާއި ގުޅިގެން ވަނީ މައްސަލަ ގޯސްވެފައެވެ. 

މިއަދު ތިމަރަފުށީގައި އަޙްމަދު ރިޔާޒުގެ ޖަގަހަ ހުޅުވި އިރުގައިވެސް، ސަންޓޯއަށް ތާއީދުކުރާ ފަރާތްތަކުން ވަނީ އެކަމާއި ދެކޮޅު ހަދައި މުޒާހަރާކޮށް އިހްތިޖާޖުކޮށްފައެވެ. ތިމަރަފުށީ އަޙްމަދު ރިޔާޒުގެ ޖަގަހަ ހުޅުއްވައި ދެއްވީ، ފިޝަރީޒް މިނިސްޓަރ އަޙްމަދު ޝިޔާމާއި ހެލްތު މިނިސްޓަރ ޑރ. ޢަބުދުﷲ ޚަލީލެވެ.

ޕްރައިމަރީގައި ޕާޓީގެ ޓިކެޓް ކާމިޔާބު ނުވި ބައެއް ބޭފުޅުން އަމިއްލަ ގޮތުން އިންތިޚާބަށް ވާދަކުރައްވާއިރު ސަރުކާރުން ގެންދަނީ، ޕާޓީ ޓިކެޓް ލިބުނު ކެންޑިޑޭޓު އެއްފަރާތްކޮށް، ސަރުކާރުން ބޭނުންވާ ކެންޑިޑޭޓުން އަމިއްލަ ކެންޑިޑޭޓުންގެ ގޮތުގައި ނެރެ އެބޭފުޅުން ހޮވުމަށް މަސައްކަތް ކުރަމުންނެވެ. އަދި ސަރުކާރުން ބޭނުންވާ ކެންޑިޑޭޓުން ހޮވުމަށްޓަކައި، ޕާޓީ ޓިކެޓް ލިބުނު ކެންޑިޑޭޓުން އިންތިޚާބު ދޫކޮށްލުމަށްވެސް ބައެއް ދާއިރާތަކުގެ ކެންޑިޑޭޓުންނަށް މަޖުބޫރުކޮށްފައިވެއެވެ.

ޕީއެންސީގެ ޕްރައިމަރީގައި ވާދަކޮށް ޓިކެޓް ލިބުނު ކެންޑިޑޭޓަށް ސަރުކާރާއި ޕާޓީން ތާއީދު ނުކުރި ސަބަބެއް އެނގިފައެއް ނުވެއެވެ. އެހެން ނަމަވެސް ޕީއެންސީ އާއި ސަރުކާރުގެ މިއަމަލުތަކަކީ، ޑިމޮކްރެސީގެ ރޫޙާއި މުޅިން ޚިލާފު އަމަލުތަކަކަށްވާތީ އެކަމާއި ގުޅިގެން އިދިކޮޅު ފަރާތްތަކުންނާއި ސަރުކާރު ހިންގާ ޕާޓީގެ މެމްބަރުންގެ ފަރާތުންވެސް ސަރުކާރަށް ފާޑުކިޔުންތައް އަމާޒުވެފައި ވެއެވެ. ރައްޔިތުންގެ މަޖިލީހުގެ ތިމަރަފުށީ ދާއިރާގެ ގޮނޑީގައި މިހާރު އިންނެވީ، ސަރުކާރުން ތާއީދުކުރާ އަޙްމަދު ރިޔާޒުގެ ކޮއްކޮ، ޢަބްދުﷲ ރިޔާޒެވެ.

އެދާއިރާގެ ގޮނޑި ކާމިޔާާބު ކުރާނެކަމަށް ބެލެވިފައި ވަނީވެސް އަޙްމަދު ރިޔާޒެވެ.