ހުވަދު އަތޮޅުގައި އާރްޓީއެލްގެ ޚިދުމަތް ފެށުމަށް ތައްޔާރުވެއްޖެއެވެ.

މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ އިން ހާމަކުރައްވާފައިވާ ގޮތުގައި، އާރުޓީއެލް ފެރީ ހިދުމަތް ޒޯން 5 (ގއ އަދި ގދ) ގައި ފެށުމުގެ ތައްޔާރީތަކުގެ ތެރެއިން ހިދުމަތަށް ބޭނުންވާ 6 ފެރީ ޒޯން 5 އަށް ދިއުމަށް މިއަދު ވަނީ ފުރުވާލާފައެވެ.

މިއަދު މެންދުރު މިފެރީތައް ފުރާފައި ވަނީ، ހުޅުމާލެ ފެރީ ޓާމިނަލުންނެވެ.

އާރްޓީއެލްގެ ޚިދުމަތްދޭ، ކުންފުނި އެމްޓީސީސީގެ ސީއީއޯ އާދަމް އާޒިމް މިއަދު ވިދާޅުވީ، އާރްޓިއެލް ފެރީތަކުގެ ތަޖުރިބާކުރުމުގެ ދަތުރުތައް މިމަހުގެ 13 ވަނަ ދުވަހުން ފެށިގެން 19 ވަނަ ދުވަހާއި ހަމައަށް ހުވަދު އަތޮޅުގައި ކުރިޔަށް ގެންދާނެ ކަމަށެވެ. އަދި މިމުއްދަތުގައި އާރްޓީއެލްފެރީގައި ދަތުރުކުރައްވާ ފަރާތްތަކުން ޓިކެޓް ގަންނާކަށް ނުޖެހޭނެއެވެ.

އަދި ރަސްމީކޮށް ޓިކެޓްވިއްކައިގެ އާރްޓީއެލްގެ ދަތުރުތައް ހުވަދު އަތޮޅުގައި ފަށާނީ މިޖުލައި މަހުގެ 20 ވަނަ ދުވަހުން ފެށިގެން ކަމުގައިވެސް އާޒިމް ވަނީ ވިދާޅުވެފައެވެ.

ސްޕީޑް ފެރީތައް ބޭނުންކޮށްގެން މުޅި ރާއްޖެ ގުޅައިލުމުގެ ގޮތުން، ރާއްޖެ ޓްރާންސްޕޯޓް ލިންކްގެ ސްޕީޑް ފެރީގެ ޚިދުމަތް އެންމެ ފުރަތަމަ ފެށީ ތިލަދުއްމަތީގައެވެ.