ރައްޔިތުންގެ މަޖިލީހުގެ އިދާރާއާއި ޔޫ.އެން.ޑީ.ޕީ ގުޅިގެން ތަޢާރަފް ކުރުމަށް ހަމަޖެހިފައިވާ އީ-ޕެޓިޝަންގެ ނިޒާމުގެ ސިޔާސަތު ކަރުދާހަށް ޢާންމުންގެ ޚިޔާލު ހޯދުމަށް ރައްޔިތުންގެ މަޖިލީހުގެ އިދާރާއިން ހުޅުވާލައިފިއެވެ.

ރައްޔިތުންގެ މަޖިލީހުގެ އިދާރާއިން ވިދާޅުވީ، މިކަރުދާހަށް ޚިޔާލު ހުށައަޅަން ބޭނުންވާ ފަރާތްތަކަށް މިއޭޕްރީލްމަހުގެ 29ވާ ހޯމަ ދުވަހުގެ މެންދުރު 12:00 އާއި ހަމައަށް ފުރުޞަތު ހުޅުވާލާފައި ވާކަމަށެވެ. މިގޮތުން ޚިޔާލު ހުށައެޅުއްވޭނީ އީމެއިލުންނާއި ޕޯޓަލް މެދުވެރިކޮށް ކަމުގައި މަޖިލީހުގެ އިދާރާއިން ވަނީ ވިދާޅުވެފައެވެ.

މިގޮތުން ޚިޔާލު ހުށައަޅުއްވަންވީ އީމެއިލް އެޑްރެސް:

Advertisement

[email protected]

ޚިޔާލު ހުށައަޅުއްވަންވީ ޕޯޓަލް ލިންކް:

http://forms.office.com/e/1EUi4ibQve

ރައްޔިތުންގެ މަޖިލީހުގެ އިދާރާއިން ވިދާޅުވީ، މިސިޔާސަތުގައި ހިމެނޭ މުހިއްމު މަފްހޫމްތަކާއި މިނިޒާމް ތަރުތީބު ކުރެވިފައިވާ ގޮތް ތަފްސީލްކޮށްދިނުމަށްޓަކައި މައުލޫމާތު ދިނުމުގެ ޚާއްޞަ ބައްދަލުވުންތަކެއްވެސް ބޭއްވުމަށް ހަމަޖެހިފައިވާ ކަމަށެވެ.

މިގޮތުން މިކަމާއި ގުޅޭ ބައްދަލުވުންތައް މި އޭޕްރީލް މަހުގެ 24 އަދި 25 ވަނަ ދުވަހު އޮންނާނެ ކަމަށާއި، 24 ވަނަ ދުވަހު ބާއްވާ ބައްދަލުވުން ޚާއްޞަކޮށްފައި ވަނީ ސަރުކާރުގެ އިދާރާތަކާއި، ސިޔާސީ ޕާޓީތަކާއި، ޔުނިވަސިޓީތަކާއި މަދަނީ ޖަމިއްޔާތަކަށް ކަމުގައި މަޖިލީހުގެ އިދާރާއިން ވިދާޅުވެފައި ވެއެވެ. މިބައްދަލުވުން އޮންނާނީ އެދުވަހުގެ ހެނދުނު 10:00ގައި ރައްޔިތުންގެ މަޖިލީހުގެ އިދާރާގައެވެ. 

މީގެ އިތުރުން މިކަމާއި ގުޅިގެން އާއްމުންނަށް މައުލޫމާތު ދިނުމަށް ބާއްވާ ބައްދަލުވުން ބޭއްވުމަށް ހަމަޖެހިފައި ވަނީ އޭޕްރީލް 25 ވަނަ ދުވަހުގެ ހަވީރު 4:00ގައި މަޖިލީހުގެ އިދާރާގައި ކަމަށްވެސް މަޖިލީހުގެ އިދާރާއިން ހާމަކުރައްވާފައިވެއެވެ.