އަޅުގަނޑުމެން ކުރާ ހެޔޮ ޢަމަލުތަކަށް ރައްކާތެރިވުމަކީ، އަޅުގަނޑުމެން ސަމާލުކަންދޭންޖެހޭ މުހިންމު ކަމެކެވެ. އެހެން ނޫންނަމަ އެ ހެޔޮ އަމަލުތަކުން އެއްވެސް ދަރުމައެއް ނުލިބި ހިނގައިދާނެއެވެ.

"ނޫން.އެމްވީ"ގެ ރޯދައާ ހެޔޮ އަމަލުގެ ތޭވީސްވަނަ އެޕިސޯޑުގައި ޝެއިޙް އިލްޔާސް ޖަމާލް ވާހަކަފުޅު ދެއްކެވީ ތައައްލީ ކުރުމުން ދުރުހެލިވުމާ ގުޅޭގޮތުންނެވެ.

ޤުދްސީ ޙަދީޘެއްގައި ﷲ ތަޢާލާ ވަޙީކުރައްވަނީ:

Advertisement

«من ذا الذي يتألى عليّ أن لا أغفر لفلان فإني قد غفرت لفلان وأحبطت عملك » رواه مسلم  

މާނައީ: " މިވެނި މީހަކަށް ތިމަން އިލާހު ނުފުއްސަވާނެކަމަށް ބުނެ ތިމަން އިލާހުގެ މައްޗަށް ތައައްލީކުރަނީ ކާކު ހެއްޔެވެ؟ ފަހެ ހަމަކަށަވަރުން ތިމަން އިލާހު މިވެނި މީހަކަށް ފުއްސަވައިފީމެވެ. އަދި ތިބާގެ ޢަމަލު ބާޠިލްކުރައްވައިފީމެވެ."

ލޮބުވެތި މުސްލިމު އަޚުންނާ އުޚްތުންނޭވެ. މީސްމީހުންނަށް ޙުކުމް ނުޖައްސަވާ! ﷲ ގަންދީ ހުވާކޮށް މިވެނި މީހަކު ދުވަހަކު ވެސް އިޞްލާޙެއް ނުވާނެއޭ، އޭނާ ދާނީ ނަރަކައަށޭ، އޭނާއަށް ﷲ ނުފުއްސަވާނެއޭ، މިފަދަ ބަސްތަކުން މީހުންނަށް ޙުކުމްކޮށް ﷲ ގެ މައްޗަށް ތައައްލީ ނުކުރައްވާށެވެ. ތައައްލީ ކުރުމަކީ ތިބާގެ ހެޔޮ ޢަމަލުތައް ބާޠިލްވެދާނެކަމެކެވެ. 

މި މަޢުޟޫޢުއާ ގުޅޭގޮތުން ޝެއިޙް ދެއްކެވި ވާހަކަ އަޑު އެއްސެވުމަށާއި ބެއްލެވުމަށް، ވީޑިއޯ ޕްލޭ ކުރައްވާ!