ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގުޅިފަޅުގެ ބިމަށް އިތުރު ކުރެއްވުމަށް ވަޢުދުވެވަޑައިގެންނެވި، ސަރަހައްދަށް ގޯތި ބަދަލުކުރަން ބޭނުންވާ މީހުންނަށް ހައުސިންގ މިނިސްޓްރީން ފުރުޞަތު ހުޅުވާލައިފިއެވެ.

އެމިނިސްޓްރީން ވިދާޅުވީ، ރައީސުލް ޖުމްހޫރިއްޔާ ގެ ވަޢުދުފުޅާއި އެއްގޮތަށް ގުޅިފަޅަށް 85 ހެކުޓަރުގެ ބިން އިތުރުކޮށް ގިރާވަރުފަޅުން ދޫކުރި ގޯތިތަކުގެ ތެރެއިން ގުޅިފަޅަށް ބަދަލުވާން ބޭނުންވާ ފަރާތްތަކަށް އެފުރުސަތު ޕޯޓަލް މެދުވެރިކޮށް މިހާރު ހުޅުވާލާފައި ވާ ކަމަށެވެ. 

ހައުސިންގ މިނިސްޓްރީން ވިދާޅުވީ، ގިރާވަރުފަޅުން ގުޅިފަޅަށް ބަދަކު ކުރުމަށް ހަމަޖައްސާފައި ވަނީ، 1250 އަކަފޫޓޫގެ 193 ގޯއްޗާއި، 1650 އަކަފޫޓުގެ 663 ގޯއްޗާއި، 2050 އަކަފޫޓުގެ 487 ގޯއްޗާއި، 2450 އަކަފޫޓުގެ 4 ގޯއްޗެވެ. 

ހައުސިން މިނިސްޓްރީން ބުނީ ގިރާވަރުފަޅުން ދޫކޮށްފައިވާ ގޯތިތައް ގުޅިފަޅަން ބަދަލުކުރަނީ، އެ ފަޅުގެ ލޭންޑް ޔޫސް ޕްލޭނަށް ބަދަލުގެނައުމަށް ކަމަށެވެ. މިގޮތުން ގިރާވަރުފަޅުން ގޯތިތައް ދޫކޮށްފައި ވަނީ އެފަޅު އާބާދު ކުރާއިރު ކޮންމެހެން ބޭނުންވާ މުހިއްމު ޚިދުމަތްތަކަށް ބިން އެކަށައެޅުމެއް ނެތިކަމުގައި ހައުސިންގ މިނިސްޓްރީން ވަނީ ބުނެފައެވެ.

ގިރާވަރު ފަޅުން ދިނުމަށް ނިންމާފައިވާ 1300 ވުރެ ގިނަ ގޯތި، ގުޅިފަޅަށް ބަދަލުކުރުމަށް ސަރުކާރުން ނިންމި އިރު، ގިރާވަޅުފަޅާއި ޖެހިގެން އޮތް އުތުރު ތިލަފަޅު ވަނީ، ޗައިނާގެ ކުންފުންޏަކަށް ދަނޑުވެރިކަމުގެ މައްސައްކަތަށް ދީފައެވެ.

ގުޅި ފަޅަކީ، މާލޭގެ ޕޯޓާއި ގުދަންތައް ބަދަލުކުރުމުގެ އިތުރުން، ސިނާޢީ އެހެން ބޮޑެތި މަސައްކަތްތަކަށްވެސް ޙާއްޞަ ކުރުމާއި އެކު މީހުން ދިރިއުޅުމަށް ގޯތިވެސްދީފައިވާ ފަޅެެވެ. ގިރާވަރުފަޅަކީ މާފުށި ފަދައިން ފަތުރުވެރިކަން ތަރައްޤީވެގެންދާނެ ކަމަށް އުއްމީދު ކުރެވޭ ފަޅަކަށް ވާއިރު، އެފަޅުން ދޫކޮށްފައިވާ 1300 ވުރެ ގިނަ ގޯތި ގުޅިފަޅަށް ބަދަލުކުރުމަށް ސަރުކާރުން ނިންމާފައިވާ ސަރަހައްދަކީ އަދި ބިން ނުހިއްކައި އޮތް ސަރަހައްދެކެވެ.