މިއަހަރުގެ ފިތުރު އީދު ދުވަހުގެ ހަވީރު 4އިން 6އަށް އެއްގަމު އިންޖީނުލީ އުޅަނދު ފަހަރު މާލޭގައި ނުދުއްވާ ގޮތަށް މާލޭ ސިޓި ކައުންސިލުން ހަމަޖައްސައިފިއެެވެ.

މާލޭގައި ހިނގާފައި އުޅޭ ވަގުތެއް އެންމެ ފުރަތަމަ ފާހަގަކުރަން ފެށީ ރައީސް މައުމޫނުގެ ވެރިކަމުގައެވެ. އޭގެ ފަހުން ރައީސް ނަޝީދުގެ ދައުރުގަޔާއި ރައީސް ޔާމީނުގެ ދައުރުގައިވެސް އެކަން ކުރިޔަށް ގެންގޮސްފައިވެއެވެ.

މީގެ އިތުރުން މިއަހަރުގެ ފިޠުރު އީދު މާލެ ސަރަހައްދުގައި ކުލަގަދަ ގޮތެއްގައި ފާހަގަކުރުމުގެ ގޮތުންވެސް ތަފާތު ހަރަކާތްތައް ސިޓީ ކައުންސިލުން ވަނީ ރާވާފައެވެ. އެގޮތުން ޚާއްޞަ ގޮތެއްގައި އީދަށް މާލެ އާއި ހުޅުމާލެ ލައިޓްތަކުން ޒީނަތްތެރުކުރުން ހިމެނެއެވެ.

Advertisement

އީދާއި ގުޅުވައިގެން ސިޓީ ކައުންސިލުން ކުރިޔަށް ގެންދިޔުމަށް ރާވާފައިވާ ހަރަކާތްތަކުގެ ތެރޭގައި، އީދު ސައި، ފެންކުޅި، ބޮޑު މަސް ނެރުމާއި މާލި ޕެރޭޑް އަދި ސަގާފީ ހިނގުމާއި ކުޅިވަރުގެ ހަރަކާތްތައް ހިމެނެއެވެ. މީގެ އިތުރުން އާޓިފިޝަލް ބީޗުގައި ސްޓޭޖް ޝޯވ އެއް ބޭއްވުމުގެ އިތުރުން، ހަވާއެރުވުންވެސް އޮންނާނެ ކަމުގައި ސިޓީ ކައުންސިލުން ހާމަކޮށްފައިވެއެވެ.

އީދާއި ގުޅޭ ގޮތުން ކުރިޔަށް ގެންދާ ހަރަކާތްތަކުގެ ތަފްސީލްތައް، ސިޓީކައުންސިލްގެ ސޯޝަލްމީޑިއާ ޕްލެޓްފޯމްތަކުން ލިބިވަޑަިއގަންނަވާނެއެވެ.