ސްކޫލުގައި ދެވޭ ތަޢުލީމަކީ ކިހާ މުއްހިއްމު އެއްޗެއްކަން މިހާދިސާއިން އެނގިގެން ދެއެވެ. އެއީ، އިނގިރޭސި ވިލާތުގެ ސްކޫލެއްގައި ކިޔަވަމުން ދިޔަ އުމުރުން 10 އަހަރުގެ ކުޑަކުއްޖެއްގެ ސަބަބުން ސުނާމީ ކާރިސާގައި އެތައް ބައެއްގެ ފުރާނަ ސަލާމަތް ވުމުންނެެވެ.

2004 ވަނަ އަހަރު އިންޑިއާ ކަނޑުގައި އުފެދުނު ބާރުގަދަ ސުނާމީ އަކީ މިހާތަނަށް ދުނިޔެ ދުށް އެންމެ ގެއްލުން ބޮޑު ސުނާމީއެވެ. އެކާރިސާގައި އިންޑިއާކަނޑުގެ އައްސޭރިފަށުގެ ޤައުމުތަކުންނާއި ޖަޒީރާ ޤައުމުތަކުން، ޖުމުލަ 228،00 މީހުން މަރުވިއެވެ.

އޭރު، ޓިލީ ސްމިތް އަކީ، އުމުރުން 10 އަހަރުގެ ސްކޫލު ކުއްޖެކެވެ. އާއިލާއާއެކު ތައިލެންޑްގެ ޕުކެޓްއަށް އޭނާ އައީ ޗުއްޓީ ހޭދަކޮށްލާށެވެ. 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު، ޓިލީ ޕުކެޓްގެ މައިޚާއޯ ބީޗުގައި ހުއްޓައި އޭނާއަށް އާދަޔާ ޚިލާފުކަންތައްތަކެއް ފާހަގަވިއެވެ. ކުއްލިއަކަށް ދިޔަވަރު ހިކިގެން ދިޔުމާއި، ރާޅުތައް ގިނަވެ އޮއެވަރު ބޭރަށް ދަމަށް ފެށުމުން އެއީ، އޭގެ ހަފްތާތަކެއް ކުރިން އޭނާ ޖޯގްރަފީ ކްލާހުގައި ކިޔެވި ސުނާމީއެއް އެރުމުގެ ކުރިން ފެންނަ އަލާމާތްތައްކަން އޭނާ ދެނެގަތެވެ. 

ތައިލެންޑްގެ ޕުކެޓްއަށް ސުނާމީ އަރަމުން ދިޔަ ވަގުތު --

އެންމެ ފުރަތަމަ ސުނާމީއެއް އަންނަން އުޅޭ ކަމުގެ އިންޒާރު، ޓިލީ ދިނީ ގޮނޑުދޮށުގައި ތިބި އޭނާގެ މައިންބަފައިންނަށެވެ. އޭގެފަހުގައި ލައިފްގާޑުންނާއި ގޮނޑުދޮށުގައި ތިބި ފަތުރުވެރިންނަށް ކުރިމަތިވާން އުޅޭ ބިރުވެރިކަމުގެ ޚަބަރު ދިނުމުން، އެ ގޮނޑުދޮށް ވަަރަށް އަވަހަށް ހުސްކުރެވުނެވެ. ސުނާމީގެ ރާޅުތައް ޕުކެޓްގެ ގޮނޑުދޮށްތަކަށް ބިންދާލީ އޭގެ މިނިޓްކޮޅެއް ފަހުންނެވެ.

2004 ގެ ސުނާމީ ކާރިސާގައި، ޕުކެޓުން، 117 މީހުންމަރުވެ 214 މީހުން ގެއްލުނެވެ. އޭގެ ތެރޭގަައި 51 ފަތުރުވެރިންވެސް ހިމެނުނެވެ. ސުނާމި ކާރިސާއިން ޓިލީ އާ އޭނާގެ އާއިލާ ސަލާމަތްވިއެވެ.