ކުރީ ސަރުކާރުގައި، ހއ. ހޯރަފުށީގައި އިމާރާތްކޮށްފައިވާ ހާފްވޭ ހައުސް ޖުވެނައިލް ރެސިޑެންސް ޓްރީޓްމެންޓް ސެންޓަރަކަށް ބަދަލުކޮށް އެތަން ވަރަށް އަވަހަށް ހުޅުވާނެ ކަމުގައި ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.

ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރ އިހްސާން ވިދާޅުވީ، ކުޑަކުދިން ކުށުގެ ވެށިން ސަލާމަތް ކުރުމަށް ކުރެވޭ މަސައްކަތްތަކުގައި، މިސަރުކާރުގެ ވިސްނުމަކީ އެކަމަށް ޚާއްޞަ ރަށެއް ގައި ޚިދުމަތްތައް ޤާއިމް ކުރުން ކަމަށެވެ. މިގޮތުން ކުށުގެ ވެށީގައި އުޅޭ ކުޑަކުދިން ދައުލަތުގެ ބެލުމުގެ ދަށަށް ނަގައި އެކުންދިން މުޖުތަަޢުން އެކަހެރިކޮށް އެކުދިންނަށް ދޭންޖެހޭ ފަރުވާތައް ދިނުމަށް ސަރުކާރުން ޚާއްޞަ އިސްކަމެއް ދެއްވާނެ ކަމުގައިވެސް އިޙްސާން ވިދާޅުވިއެވެ. އަދިކަމަށްޓަކައި ޚާއްޞަ އިންތިޒާމްތަކާއި ނިޒާމްތަކެއް އެކަށައަޅައި ވަސީލަތްތައް ޤާއިމްކުރަން ޖެހޭ ކަމުގައިވެސް އިޙްސާން ވިދާޅުވިއެވެ.

އިހްސާން ވިދާޅުވީ، ކުޑަހުވަދޫގައި ހަދަންފަށާފައިވާ، ކުޑަކުދިންގެ ރެސިޑެންޝަލް ޓްރީޓްމެންޓް ސެންޓަރުގެ މަސައްކަތް ނިމިފައި ނުވާކަމަށާއި އެހެން ނަމަވެސް، ހޯރަފުށީގައި ޤާއިމްކުރާ، ހާފްވޭ ހައުސްގެ މަސައްކަތް މިހާރު ހުރީ ނިމިފައި ކަމަށެެވެ.

ހޯމް މިނިސްޓަރ ޢަލީ އިޙްސާން ވިދާޅުވީ، މިފެށޭ ހަފްތާގައި އެތަން ހުޅުވާނެ ކަަމަށެވެ. މިގޮތުން އެތަނުގެ ކެޕޭސިޓީއަށް ނެގޭ އެންމެ ގިނަ އަދަަދަކަށް ކުދިން ނަގައި، ރިހެބިލިޓޭޝަން ފަށާނެ ކަމުގައިވެސް މިނިސްޓަރ އިޙްސާން ވިދާޅުވިއެވެ.

މިނިސްޓަރ އިހްސާން ވިދާޅުވީ، ކުށުގެ ވެށިން ގެނެވޭ ކުޑަކުދިން ކޯޓު ޙުކުމެއްގެ ދަށުން 18 އަހަރުވަންދެއް ދައުލަތުގެ ބެލުމުގެ ދަށުގައި ބަހައްޓާނެ ކަމަށެވެ. 

މިގޮތުން އެސެންޓަރުތަކުގައި ކުޑަކުދިންނަށް ދީނީ ކަންކަން އުނގަންނައި ދިނުމާއި، އުމުރާއި ގުޅޭ ރަސްމީ ތަޢުލީމު ދިނުމާއި، އަޚުލާޤީ ގޮތުން ކުދިންނަށް ދޭންޖެހޭ ފަރުވާ ދިނުމާއި، ހުނަރުތައް ތަރައްޤީކުރުމާއި ސައިކޯ ސޯޝަލް ސަޕޯޓް ދިނުން ހިމެނޭނެ ކަމަށެވެ.